23-anyos nga babaye gipusil patay sa Barangay Suba

CEBU, Philippines — Patay ang usa ka babaye human kini gipusil diha sa Block 1, Sitio Buwaran, Barangay Suba, Siyudad sa Sugbo kagahapon sa buntag, Marso 10, 2024.

Ang biktima mao si Mylene Dumalaoco, 23 anyos, residente sa nahisgutang dapit.

Dali nga girespondihan sa Sawang Calero Police Station ang maong alarma dihang nakadawat og tawag mahitungod sa shooting incident.

Pag-abot nila sa lugar nakit-an  nalang ang biktima nga naghigda sa folding bed ug nagkadugo.

Base sa imbestigasyon sa Sawang Calero Police Station ang biktima padung na unta matulog dihang kalit niabot ang wa mailhing tawo nga kalit nipusil sa biktima.

Nasuta nga ang nagpusil nangutana pa sa biktima mahitungod sa cellphone apan mihimakak kini ug miingon nga wala siya'y kasayuran niini ug dayon gipusil.

Samtang ang nag inusara nga mamumuno padayon pa nga gipangita sa kapolisan sa Sawang Police Station 6.

Nakuha sa crime scene ang buhing bala sa 9mm nga armas. — /MEL (BANAT NEWS)