MANILA, Philippines — Mokabat sa P34,000.00 nga kantidad sa gituohang shabu ang nasakmit sa mga sakop sa City Drug Enforcement Unit (CDEU) sa Lapu-Lapu City Police Office (LCPO).
Kini atol sa buy-bust operation diin ilang nasikop ang pusher diha sa Barangay Mactan sa siyudad sa Lapu-Lapu niadtong Biyernes sa hapon Marso 8, 2024.
Si Police Major Airbert Jay Samson, pangulo sa CDEU sa LCPO miingon nga ang ilang nadakpan nga si alyas Bogoy, 40 anyos nagpuyo usab sa maong dapit ug nakuha ang lima ka gramo sa gituohang shabu. Dugang pa ni Samson nga mitumaw ang pangalan sa maong dinakpan gikan sa mga pusher nga una na nilang nadakpan sa ilang mga operasyon.
Kini ang nakaaghat kanila sa paghimo og mga pagpaniid hangtud nga natigayon ang buy bust operation.
Kasong kalapasan sa paghupot ug pagbaligya og ilegal nga drugas ang ipasaka batok sa dinakpan karong Lunes sunod semana. (BANAT NEWS)