CEBU, Philippines — Isumbong ngadto sa Land Transportation Office (LTO)-7 ang mga malapason sa lagda sa trapiko sa Dakbayan sa Talisay.
Kini ang nasabutan sa taga City of Talisay-Traffic Operation Development and Authority (CT-TODA) ug sa LTO atol sa ilang tigom nga gihimo. Si Jonathan Tumulak, pangulo sa CT-TODA ang naalarma sa gidahanon sa diagrasya sulod lang sa duha ka buwan diha sa ilang hurisdiksiyon.
Ang CT-TODA nakatala og 243 ka disgrasya sa nilabay nga duha ka buwan karong tuiga.
Si Tumulak nipasabot nga bisan pa og simple lang nga kalapasan ang nahimo sa usa ka motorista ila gihapon kini nga i-endorsar ngadto sa LTO.
Ang LTO na ang mopatawag sa malapason sa lagda sa trapiko ug kong dili kini motungha sa pagpatawag ilaha kining isyuhan aron maalarma sa ilang pag-renew sa lisensiya.
Ang CT-TODA, LTO lakip na ang Highway Patrol Group (HPG)-7 mopahigayon og kinalit nga checkpoint sa bisan asa nga dapit sa Dkbayana sa Talisay. (BANAT NEWS)