CEBU, Philippines — Atol sa gipahigayon nga flag raising ceremony sa mga empleyado sa Cebu City Hall nga gipangulohan ni Mayor Michael Rama, gipahibalo usab ni City Administrator Collin Rosell ang paglahugay sa mga department heads sa city hall.
Sumala pa ni Rosell ang pagpahigayon sa maong rotasyon sa mga department heads aron mahatag ang world class nga serbisyo para sa tanan mga molopyo sa dakbayan subay sa kamanduan sa mayor.
Si Rosell, isip city administrator nadugangan siya og trabaho human gitudlo usab siya isip hospital administrator sa Cebu City Medical Center ug gitagaan og tulo ka buwan alang sa paghuman sa gitahas niini para sa maong tambalanan ug sa naglibot niining dapit.
Si Rosell , tabangan ni Ian Hassamal ang pangulo sa Department of General Services isip maoy assistant city administrator, samtang tabangan usab ni Robert Barquilla nga maoy market administrator si Hassamal sa DGS.
Gi welcome usab si Atty. Dominic Diño nga mao nay secretary to the mayor ug si Glicerio "Cerj" Germudo ang gitudlo na Chief of Staff sa buhatan sa mayor kinsa kanhi deputy protocol officer.
Gitudlo usab si Portia Basmayor balik nga pangulo sa Department of Social Welfare and Services, samtang si Mary Ann Uy maoy PIO nga tabangan ni Jinky Rosit isip assistant head.
Pipila pa sa mga pangalan ang gihinganlan ni Rosell, na matud pa sa mayor tipik og kabahin lang kini sa mga kausaban nga ipatuman sa city hall ug mapaabot pa ang laing mga hugna sa umaabot nga adlaw. (BANAT NEWS)