CEBU, Philippines — Ang dili mopahigayon og re-blocking nga mga kapitan sa ilang mga dapit nga peligro sa sunog wala usab unya’y ayuda.
Kini ang gibutyag ni Cebu City Mayor Michael Rama.
Ang mayor nipahimangno sa mga opisyal sa barangay nga pugngan niya ang ilang tinuig nga hinabang og bahin sa Local Development Fund kon magdumili sila pag-re-block sa ilang dapit nga delikado sa sunog.
Si Rama niluwat sa iyang baroganan human sa sunog nga nahitabo sa Sta. Lucia sa Barangay Tinago niadtong Martes nga nikalas og upat ka tawo ug adunay walo ang angol.
Ang pamahayag ni Rama usa ka ultimatum tungod kay dili na siya gusto nga adunay laing makalas nga kinabuhi tungod sa sunog.
Matud ni Rama nga ang pag-re-block kasagaran niini naglakip sa pagpalapad sa mga agianan aron sa pagpadali sa mga emergency responder nga motubag sa mga nagkadaiyang alarma.
Dugang ni Rama nga ang Barangay Carreta, Lorega ug Basak Pardo lang ang nagpasiugda na sa pagpaningkamot sa re-blocking sa ilang dapit nga diin daghan ang komunidad. (BANAT NEWS)