CEBU, Philippines — Naduso na ngadto sa konseho sa dakbayan sa Sugbo ang Supplemental Budget 1 ug himoon na ang deliberasyon niini Miyerkules sunod semana.
Suma pa ni konsehal Noel Wenceslao, Chairman sa Committee on Budget and Finance nga gipahibawo siya sa Local Finance Committee (LFC) sa ilang pagduso sa SB 1 nga naglangkub sa budget proposal alang sa Palarong Pambansa ingon man sa Charter Day bonus.
Gumikan niini, tukion na kini sa konseho atol sa ilang regular session karong Miyerkules Marso 6, 2024. Una niini si Wenceslao mitug-an nga ang kinatibuk-an nga kantidad sa SB 1 mokabat sa P900 million hinoon kinahanglan pa kini niyang kompirmahon.
Nasayran nga napirmahan na ni Mayor Michael Rama ang Supplemental Budget alang ning tuiga.
“I have already signed it. The Local Finance (Committee, LFC) must have already submitted the documents to the Sangguniang Panlungsod,” suma pa ni Rama atol sa programa sa Sugboanon Channel.
kahinumduman si Konsehal Noel Wenceslao, sa nilabay nga semana nihangyo sa LFC nga isumiter dayon ang SB1 aron maaksyonan kini sa konseho sa siyudad ug ipaubos sa public hearing.
Nalakip sa SB1 ang mga pundo nga gikinahanglan alang sa transitional housing project sa siyudad, infrastructure alang sa palarong pambansa karong Hulyo ug uban nga mga item.
Ang transitional housing complex gikatakda nga tukoron sa South Road Properties kon SRP. Ang maong proyekto alang kini sa maapektohan sa paghawan sa mga 3-meter easement ug mga agianan sa tubig nga gipahigayon sa Task Force Gubat sa Baha. (BANAT NEWS)