CEBU, Philippines — Patay nang nahaw-as gikan sa dagat ang 19-anyos nga tinun-ang dalaga nga na–missing sukad pa sa Domingo, Pebrero 25, diha sa Mactan Channel sa South Road Properties kagahapon sa buntag.
Ang mao’ng patay nga lawas nakita sa mga sakop sa Philippine Coast Guard (PCG-7) sa Mactan Channel duol sa Shell Island ug positibo kini nga giila sa kabanay ug kapartyentehan sa dalaga nga kini si Niña Fuentes Arpon.
Ang maong dalaga lumad nga taga San Remigio apan dinhi nagtungha sa first year college usa ka unibersidad sa Siyudad sa Sugbu ug temporaryong nagpuyo sa iyaan diha Pagsabungan sa Dakbayan sa Mandaue.
Katapusan kining nakita naglakaw duol sa usa ka tambalanan sa Dakbayan sa Mandaue alas 12:21 sa tungang gabii niadtong Pebrero 25 ug basi sa kuha sa CCTV, padulong kini ngadto sa Marcelo Fernan Bridge.
Ang iyaha’ng mga importante nga gamit, sama sa iyang bag, ID, ug selpon, nakaplagan sa ibabaw nga bahin sa maong taytayan.
Ang ig-agaw niini nga si Rielbert Fuentes Pielago kinsa nahinabi sa Banat News pinaagi sa cellphone nagkanayon nga kanunay nila nga pahimangnuan an gig-agaw nga magpokus sa pagtuon apan daw gilain kini pagsabot sa namatay.
Gabii nianang adlaw nga kini missing giingong nananghid kini nga molakaw kay makigkita sa iyang mga barkada, apan s wala na kini mobalik.
Wala silay ideya kun duna kini problema tungod dili kini tig-estorya kanila ug magsige lang og cellphone.
Ang usa sa ig-agaw sa namatay miila nga si Arpon kini base sa gisuot niining iyang bracelet ug sa ila nga naa makita sa iyang dunggan. -- IBM BANAT NEWS