Evaluation sa mga kawani sa city hall alang sa right sizing nahuman na

CEBU, Philippines — Hingpit na nga nahuman ang evaluation sa mga empleyado sa Cebu City Hall alang sa pagpatuman sa “rightsizing” program samtang ipatuman na usab ang “massive regularization”.

“It is already done, karon formalities nalang”, butyag ni Attorney Collin Rosell, administrator sa Dakbayan sa Sugbo.

Matud ni Rossel nga ang evaluation phase 1 pa lang sa implementasyon sa rightsizing program sa administrasyon diin tumong niini mao ang pagmenos sa gidaghanon sa mga empleyado gikan sa 10,000 ngadto sa 3,000 sa tuig 2025.

Atol sa flag-raising ceremony kagahapon subling gipahibalo ni Cebu City Mayor Michael Rama nga epektibo sa Marso 1, 2024 mohimo siya og dakong kalihokan sa city hall.

Matud ni Rama nga iyaya nang gimandoan si Rosell ug ang Human Resource Department Office (HRDO) sa pag-andam sa gikinahanglang mga dokumento nga nagkinahanlan sa iyang pirma.

Si Rama nagkanayon nga ang iyang gikinahanglan lang mao ang paghatag kaniya og rason nga dili na ma-renew ang mga appointment.

Matud usab ni Rama nga ang sitwasyon usa ka padayon nga kalihokan padulong sa tumong nga digitalization ug panglantaw sa usa ka smart city.

Samtang si Rossel nagkanayon nga ang rightsizing program usa ka padayon nga proseso gipasalig usab niini nga walay empleyado nga mabiyaan.

“Wala gyu’y mahabilin, walay dili maatiman including ang katong mga tawo nga maapektaran”, padayag ni Rosell.

Sa pagkakaron, ang HRDO nga pinangulohan ni Henry Tumalabcad ang nagdumala sa proseso aron masiguro nga ang tanang appointment mahuman ug ma-endorso alang sa sunod nilang direksiyon.

Ang kagamhanan sa siyudad nagpaabot kini sa final report sa HRDO.

Gibutyag ni Rossel nga gimandoan sila ni Rama nga sugdan ang massive regularization niadtong mga empleyado nga nakapasar sa evaluation diin kabahin kini sa modification ug approach nga ilang isugyot sa mayor.

Ug sa maong pamaagi, kadtong mga casual nga kawani nga kwalipikado gikan sa evaluation mamahimong mo-apply alang sa regularization.

Gawas niini, ang organizational structure susihon usab ug usbon ingon man ang staffing pattern. (BANAT NEWS)