CEBU, Philippines — Nailhan na sa Guadalupe Police Station 9 sa Cebu City Police Office (CCPO) kun kinsa ang usa sa mga namusil sa Duterte Street, Sitio Banawa, Barangay Guadalupe, Siyudad sa Sugbo niadtong Domingo sa buntag.
Kahinumduman si Jeffrey Havel Sahol, residente sa maong lugar nakabsan sa kinabuhi human nakaangkon og samad pinusilan sa nagkadaiyang parte sa lawas niini.
Una nang gibutyag sa kapulisan nga sulod ug gawas sa prisuhan ang biktima gumikan sa kalambigitan niini sa illegal nga drugas ug paghupot og dili lisensyadong armas.
Sigon ni Police Major Kenneth Albotra, hepe sa Guadalupe Police Station riding in tandem ang mga namusil ug ang gunman nga angkas nailhan na nila.
"One thing in common ni sila, naay history on illegal drug cases and gikan sila sulod sa detention facility sa BJMP diha sa Barangay Kalunasan (possible didto nagkaila," sigon ni Albotra.
Wala sab gisalikway sa kapulisan ang posibilidad nga mga gun-for-hire ang mga suspek nga sigon ni Albotra wala pa makagawas sa siyudad sa Sugbo. (BANAT NEWS)