CEBU, Philippines — Patay sa pagpamusil ang usa ka 42-anyos nga lalake nga giingong sulod ug gawas na sa prisuhan kagahapon sa buntag diha sa R. Duterte Road, Banawa, Barangay Guadalupe, Siyudad sa Sugbo.
Ang biktima mao si Jeffrey Havel Sahol, 42, residente sa naasoy nga lugar samtang ang mga mamumuno nagsakay og motorsiklo daling daling misibat human sa krimen.
Sigon ni Police Major Kenneth Albotra, hepe sa Guadalupe Police Station 9 sa Cebu City Police Office (CCPO) nga ang biktima sulod ug gawas na sa prisuhan gumikan sa kasong kalambigitan sa illegal nga drugas ug kining paghupot dili lisensyadong armas.
Gani niadtong Huwebes lang sa miaging semana nakagawas sa prisuhan ang biktima.
Ang biktima naa ra kini sa lugar nga nahitaboan sa dihang naabot ang mga mamumuno nga sakay og motor dayong pusil sa biktima nga naigo sa nagkadaiyang parte sa iyang lawas ug maoy hinungdan sa kamatayon niini.
Gisubay karon sa kapulisan sa Guadalupe Police Station ang kalambigitan sa illegal nga drugas maoy posibleng motibo sa krimen tungod kay giingong nakadispalko.
Padayon karon ang follow up operation sa kapulisan aron madakpan ang mga suspetsado. – IBM BANAT NEWS