CEBU, Philippines — Gikompirmar na sa kapolisan sa Bohol nga ang napatay nga gidudahang sakop sa New People’s Army nga si Alyas Maya mao ang Cebuana nga Bar passer sa miaging tuig nga si Atty. Jannah Jay Cesista, ug kini kabahin sa nagpahigayon og mass recruitment para sa mga bag-ong sakop sa walhong pundok.
Si Cesista apil sa namatay sa nahitabong engkwentro tali sa grupo sa mga rebelde ug kapulisan ug militar sa Purok Matin-ao 2, Barangay Campagao, Lungsod sa Bilar, Probinsiya sa Bohol, niadtong Biyernes sa buntag.
Gitug-an sa Bohol Provincial Police Office nga ang lawas ni Cesista gikuha na matod sa iyahang amahan nga si Eutropio Cesista gikan sa Holy Name Funeral Homes sa Tagbilaran City, alas-3 sa hapon niadtong Sabado ug giingong dad-on kini ngadto sa Northern Samar.
Gikompirmar ni Lieutenant Colonel Norman Nuez, tigpamaba sa Bohol Police Provincial Office nga si alyas Maya mao gyud si Cesista.
Sa impormasyon nga gitug-an sa mga tinugyanan sa balaod nikuha sa iyahang preparatory course alang sa pagka abogada si Cesista sa usa sa mga unibersidad sa siyudad sa Sugbo ug mitiwas kini og tungha sa abogasya sa usa sa mga law schools ning siyudad.
Giingong aktibo kining miyembro sa usa ka cause oriented group.
Sigon ni Nuez nga sa impormasyon nga ilang nakuha si alyas Maya giingong kaipon ni alyas Aldrin, nga usa sab sa namatay sa engkwentro hinoon ilaha pa kining ikompirmar.
Nakakuha sab og impormasyon ang kapulisan nga ang grupo ni Domingo Ompoc Alyas Silong kinsa maoy target sa warrant of arrest sa patong-patong nga mga kaso maoy lider sa grupo ug naapil sa nakalas sa hitabo.
Giktaho sab nga atol sa pag-serve sa warrant nagpahigayon og mass recruitment effort diha sa bukirang bahin sa Lungsod sa Bilar ug kasikbit nga mga lungsod ang ilang grupo.
“Atong pipila ka bulan naa tay nadawat nga report nga dunay mga edukado o edukada nga mga miyembro sa New People’s Army nga nitabang gyud og organize sa mga masa, nang-recruit sila, ato man gud Septiyembre sa miaging tuig sunod-sunod ang engkwentro batok aning ilang grupo ni Alyas Silong, so daghan-daghan na pud ang nakalas sa ilaha, daghang political leader nila nga nahimong casualties sa kaniadtong mga encounter sa previous nga years so dako to nga set back sa ilang organization. So, mao nang siguro sa ilahang estratehiya pud nagpadala sila og mga dugang mga political leaders para motabang sa nahabilin nga remnants sa Bohol Party Committee,” sigon ni Nuez.
Nasayran nga sila si alyas Silong, alyas Darwin ug alyas Adrin pulos taga Probinisya sa Bohol samtang padayon pa sab ang pagkuha og identity sa laing usa nga si alyas Juaning.
Nasayran nga ang balay nga gitaguan sa mga nakalas dili ilaha, posible matod pa nga balay kini sa ilang dumadapig ug gipagamit lang sa ilaha.
Maong apil sa imbestigasyon sa kapulisan ang tag-iya sa balay nga gitaguan matod pa sa mga rebelde.
Pipila ka mga cause-oriented groups ang nikondenar sa nahitabo sa lima ka mga namatay sa engkwentro ug ilang gihulagway nga masaker kini.
Gitahod sa kapulisan ang pamahayag nila apan ilang gihimakak nga masaker ang nahitabo sanglit ang ang maong operasyon intelligence driven kini ug ang grupo ni Silong dunay mga warrants of arrest.
“Matod pa sa atong operatiba mao tong namatay tong usa ka police kay padung to sila mag serve sa warrant unya gipabuthan dayon mao ‘to pagsunod ato didto na nahitabo ang engkwentro kay high powered firearms ang gidala sa mga casualties sa New People’s Army, tulo ang M16 rifle ug tulo pud caliber .45….Kusganon natong gihimakak ang ilang alegasyon, anyway open man ang atong kapulisan sa investigation kung duna man sila’y pagduda sa mao nga engkwentro,” pagklaro ni Nuez. – IBM BANAT NEWS