CEBU, Philippines — Mihangyo ang konseho sa Dakbayan sa Sugbo ngadto sa executive department sa Cebu City Government nga himuong prayoridad ang katukoran sa Wastewater Treatment Facility sa Cebu City Jail kay kini kini usa na ka “long overdue project.”
Kini nga desisyon gikasabutan pinaagi sa mosyon nga gipresentar ni Konsehal Noel Wenceslao nunot sa gipadangat nga kabalaka ni Konsehal Nestor Archival ug pagpangutana sa hinungdan sa pagkalangay sa pagpatuman sa proyekto atol sa regular session niadtong Miyerkules.
Si Konsehal Francis Esparis, kinsa maoy niduso sa progress report sa proyekto, nitubag nga mao kini ang hinungdan nga iyang gipaabot ang maong report ngadto sa executive department aron masugdan dayon ang bidding.
“This is a very long-delayed project already,” matud ni Wenceslao.
“Move to request the executive department to prioritize the implementation of the construction of the wastewater treatment facility at Kalunasan,” dugang niya isip corollary motion.
Matud ni Archival, kinahanglang mahatagan dayon og pagtagad ang maong kabalaka ug gidugang nga adunay labing menos kapin sa 9,000 ka mga piniriso ang maapektuhan.
Gisugyot ni Archival nga ang bidding kinahanglang dili molapas sa Abril 2024 diin giuyonan usab sa konseho.
Nahitabo ang maong diskusyon human gi-relay ni Esparis ang minutes sa meeting nga gipatawag niadtong Pebrero 1, 2024, uban sa Cebu City Septage Management Board (CCSMB).
Gipangunahan kini sa chairman nga si Reymar Z. Hijara kinsa bag-o lang gitudlo sa mayor sa dakbayan sa Sugbo nga maoy modumala sa maong proyekto.
Kaniadtong 2018 pa sa dihang nakadawat ang Office of the Cebu City Environment and Natural Resources (CCENRO) og taho ug reklamo bahin sa “persistent” nga baho nga gikan sa Cebu City Jail Male Dormitory.
Kini sab mipadayag og mga kabalaka sa panglawas sa mga piniriso ug sa kasikbit nga mga residente, ug mga peligro sa kinaiyahan sa lugar.
Sa dihang gi-inspeksyon sa CCENRO aron ma-validate ang report, ang team nakamatikod dayon og isog nga baho sa entrada pa lang sa maong pasilidad.
Atol sa samang inspeksyon, ang CCENRO team nakaobserbar ug; itom nga kolor nga tulo sa tubig gikan sa pasilidad, ang gamay nga septic tank diin giingon dili paigo alang sa populasyon sa mga piniriso, ug ang pagkapuno sa septic tank, nga nanginahanglan dayon pasuyopan tungod sa padayon nga pagagas tubig gikan niini nga padung sa kanal ug drainage system sa maong lugar apan nangalisbo sa kabalayan.
Gitaho sab sa igsuong pamantalaan sa Banat News nga The Freeman niadtong Pebrero 19, 2024, nga nihatag na og go signal si Cebu City Mayor Michael Rama nga sulbaron kining dugay nang problema sa kabaho sa city jail, ingon man sa kakuwang sa tubig sa pasilidad.
Si Hijara sa pakighinabi mibutyag nga giaprubahan ni Rama ang pagbutang og wastewater treatment plant sa city jail.
Ang treatment plant usa ka long-term nga solusyon sa maong problema dili lang sa mga naa sa City Jail, apil na sa mga residente sa Brgy. Kalunasan ilabi na sa mga nagpuyo sa palibot. IBM BANAT NEWS