Pag-usab sa rota sa Metro Cebu Expressway gisupak

CEBU, Philippines — Dili mominus sa 50 ka barangay gikan sa siyam ka LGUs dinhi sa Cebu island ang maapektuhan sa bag-ong route alignment sa Metro Cebu Expressway.

Ang maong mga apektadong barangay mipadayag sa ilang pagsupak sa mga kausaban sa proyekto atol sa tigum uban ni Cebu Governor Gwen Garcia, LGUs ug ubang hingtungdan nga ahensya sa gobyerno kabahin sa MCE project niadtong Huwebes.

Ang MCE dunay gitas-on nga 56.9-kilometros nga expressway nga magsilbing north-to-south backbone highway, aron mahimong hapsay ang dagan sa mga sakyanan gikan sa siyudad sa Naga sa south ngadto na sa Danao City sa north nga magsubay sa kabukiran sa Sugbo.

Apan ang DPWH mipahibawo sa pag-usab sa rota nga agian sa maong expressway nga moagi na sa mga barangay sa siyudad ug kalungsuran diin dunay daghan nga namuyo kun densely populated.

Kining kausaban maoy hugot nga gisupak sa mga barangay nga maapektuhan.

Segun sa tahu sa Sugbo News ang news portal sa Probinsiya sa Sugbo nga ang siyudad sa Sugbo maoy dunay labing daghan nga barangay nga maapektuhan ug segun sa report adunay onse ka barangay, hinoon wa pa hinganli ang maong mga barangay.

Samtang ang Naga, Minglanilla, Consolacion, ug Danao dunay tag lima ka barangay matag usa ang maapektuhan sa maong development pun-an sa tulo gikan sa Talisay, Mandaue City ug upat ka barangay sa Liloan.

Gipadayag sa mga barangay officials ang ilang kabalaka nga makahatag og peligro sa mga kabalayan, mga patigayon ug mga tunghaan ang maong proyekto.

Lakip sa ilang gikabalak-an nga mahitabo ang posibleng pagkaguba sa mga karsada, landslides, pagkabara sa mga agi-anan sa tubig ingon man pagbaha.

Si Gov. Gwen Garcia nakapangutana usab sa DPWH kun nganong dunay kausaban ang maong proyekto.

“Nganong inyo mang giusab? Why are you choosing the thickly populated areas? That’s going to be very bloody, very expensive of course. It will increase the budget,” suma pa ni Gov.Garcia.

Apan giklaro sa gobernador nga dili sila supak sa expressway project apan ang ilang gisupak ang pag-usab sa orihinal nga plano.

Ang DPWH-VII nga gipanguluhan ni regional director Ernesto Gregorio Jr. miingon nga ang kalit nga kausaban sa rota naggikan sa Central Office ug ang regional headquarters mao lang ang mo-implementar niini. Gikan sa The Freeman, MEL  BANAT NEWS