CEBU, Philippines — Natangtang na kagahapon ang skywalk diha dapit sa Abellana National School ug Cebu Normal University ug gipanigurado sa Cebu City Transportation Office nga ma-cleared ang lugar sa dili pa buksan ang karsada ngadto sa publiko nga temporaryong gisirado.
Sa nilabay’ng semana, ang kagamhanan sa siyudad ang nisirado sa parte sa karsada sa diha sa P. del Rosario Street ngadto sa RR Landon sulod sa duha ka adlaw sugod niadtong Pebrero 19, 2024.
Human sa duha ka adlaw, hingpit nga gisirado ang maong karsada hangtud kagahapon alang sa pagtangtang sa nahisgutang skywalk.
Atol sa maong mga adlaw, ang mga motorista giawhag sa pagsunod sa re-routing scheme nga gihatag.
Ang regular nga dagan sa trapiko diha sa maong lugar ibalik karong adlawa.
Kagahapon, ang Cebu BRT management’s page nipakita sa main span sa skywalk nga gitangtang usab.
Si Atty. Kent Jongoy, assistant head sa CCTO nagkanayon nga kinahanglan pa nga mahawanan ang lugar una kini subling buksan.
Molanat ngadto sa 15 ka adlaw ang pagkuha sa estraktura base sa giaprobahan sa Traffic Management Board apan si Cebu City Mayor Michael Rama nagkanayon nga kinahanglang madali ang pagtangtang sa estraktura.
Duha ka semana ang nakalabay ang skywalk diha sa Osmen Boulevard ang natangtang na usab kini diin nakahatag kini og kahuot sa dagan sa trapiko tungod sa kalit nga pagsirado sa karsada diha sa lugar.
Tumong sa temporaryong pagsirado sa karsada alang sa safety sa tanang motorista ug pedestrians nga moagi sa lugar. Gikan sa The Freeman, BDB BANAT NEWS