CEBU, Philippines — Gipasidunggan sa Cebu City Police Office (CCPO) ang tulo ka mga polis nga nadestino sa Mabolo Police Station nga abtik kaayo nadakop sa duha ka isnatser niadtong Pebrero 20, 2024, Martes sa buntag diha sa Pope John Paul II, Barangay Mabolo, Siyudad sa Sugbo.
Sila si Patrolman Jay Duron, Patrolman Francisco Ramos Jr., ug Patrolman Gem Dayo nga sakop sa Urban Patrollers sa Mabolo police Station maoy nakadakop sa 52 anyos ug 29 anyos nga mga isnatser human nangayo og tabang kanila ang biktima.
Sigon ni Police Lieutenant Colonel Janette Rafter, Deputy City Director for Operations sa Cebu City Police Office(CCPO) nga giila ni CCPO Director Colonel Ireneo Dalogdog ang pagpaningkamot sa maong mga polis aron mamentinar ang kahapsay ug kalinaw sa dakbayan.
Gihulagway ni Rafter kun unsa ka impotante ang presensiya sa kapulisan sa kadalanan sa tanang oras aron makatubag sa tanang matang alarma o emerhensiya.
Gawas kang Dalogdog, gidayeg sab ni PRO-7 Regional Director Brigadier General Anthony ang tulo tungod sa paspas nilang aksyon. (CEBU NEWS)