CEBU, Philippines — Usa ka graduwado sa Balay Silangan ug kauban nasikop sa drug bust sa mga sakop sa Philippine Drug Enforcement Agency Cebu Provincial Office, kapolisan ug kasundalohan sa Purok Mahayahay, Barangay Sonog sa lungsod sa San Francisco, Biyernes sa gabii.
Ang nasikop naila nga si Jufer Belmoro, 40, maoy target sa operasyon. Matud pa nakakompleto kini sa Municipality Balay Silangan Reformation Program kaniadto. Nadakpan sab ang matud pa iyang kakunsabo nga si Jilou Montalban, 34.
Nasakmit gikan sa duha ang 120 gramos nga gituohang shabu nga mobalor og P816 mil, buy-bust money, tulo ka cellphone, usa ka caliber .45 pistol nga adunay duha ka magazines, pito ka bala ug usa ka multicab.
Matud pa sa tigpamaba sa PDEA7 Leia Alcantara ang dinakpan makadispatsar og 500 gramos nga shabu matag semana.
Sumala pa ni Alcantara, ang Balay Silangan Reformation Program lahi kini sa mga drug rehab centers tungod kay ang mga kliyente mga kwalipikado nga mga pushers, mga street level nga walay kaso ug walay records kay boluntaryong nitahan.
Dugang pa ni Alcantara, mahimo usab ang mga plea bargainers nga naay court order alang sa BSRP, nga gipadagan sa Local Government Unit.
Nitahan sa una si Belmoro ug nasulod sa maong rehabilitasyon niadtong March 2018 kauban ang laing 17 ka plea bargainers. Nakahuman sila sa programa niadtong Septiyembre 2021.
Ang dinakpan mag atubang og kaso nga Sections 5, 11, and 12, Article II of RA 9165 ug violation sa RA 10591.