P1.1 milyon nauli ngadto sa pamilya sa mga biktima sa disgrasya

CEBU, Philippines — Gibutyag ni Police Major Nelson Lamoco, hepe sa Mabinay Police Station sa Probinsiya sa Negros Oriental nga nikabat ngadto sa P1,135,200 ang kwarta nga nauli ngadto sa mga pamilya sa namatay ug naangol sa pagkatagak sa truck de karga didto sa Sitio Tubod, Barangay Bulwang, Lungsod sa Mabinay.

Gikataho nga ang truck adunay sakay nga 17 ka tawo gikan sa Lungsod sa Libertad ug padulong unta kini sa Barangay Dawis, Bayawan City aron mangompra og hayopan sama sa baka, baboy, kanding ug uban pa.

Apan pag-abot diha sa naasoy nga lugar nawagtangan og preno ang truck ug wala na makakontrolar ang drayber hinungdan nga nideretso kini sa pang-pang nga dunay gilawmon nga 40 ngadto sa 50 ka tiil diin 15 ka tawo ang nakalas ug duha ang naangol sa maong hitabo.

Matud ni Lamoco nga samtang gitabang ang mga biktima, ang opisyales sa barangay sa lugar nga nahitaboan maoy first responder ug nagbutang sa mga bag sa mga biktima nga gisudlan sa ilang kwarta sa sako ug didto giusa tanan.

Ug dihang naabot ang mga polis sa Mabinay Police Station i-turnover unta sa maong opisyales sa dapit nga nahitaboan ang kwarta ug mga gamit sa mga biktima apan nimando si Lamoco nga ipadala kini sa nahisgutang opisyales ngadto sa police station uban ang mga polis ug bantayan hangtud nga maabot ang mga tagtungod sa mga biktima.  Ang kwarta gikwenta sa anak sa drayber sa truck kinsa usa sa mga naka-survive sa hitabo ug nianang pagkagabii nakuha dayon kini sa pamilya sa mga biktima.

Dugang ni Lamoco nga nagpaabot sila sa desisyon sa pamilya sa mga biktima ilabi na sa mga namatyan kon mopasaka kini og kaso batok sa drayber. — BDB BANAT NEWS