CEBU, Philippines — Ang Inayawan Police Station 7 sa Cebu City Police Office (CCPO) aduna nay lead sa duha ka suspetsado nga namusil sa usa ka babaye nga miyembro sa LGBTQ Community ug naamong pa ang usa ka menor de edad sa Sitio Upper Tabucanal, Barangay Poblacion Pardo, Siyudad sa Sugbo sa niaging adlaw.
Matud ni Police Major Jeciree Basitao, hepe sa Inayawan Police Station nga nagpahigayon na sila og hot pursuit operation batok sa suspetsado apil ang drayber sa motorsiklo nga gisakyan niini dihang gihimo ang krimen.
Gikataho nga love triangle ang gisubay sa kapolisan nga hinungdan sa maong hitabo tungod kay ang uyab sa suspek nga si alyas Makmak giingong ex-girlfriend sa biktima nga si alyas Kisses .
Base sa imbestigasyon sa kapolisan nasayran nga ang biktima kadaghan na nakadawat og hulga sa kinabuhi tungod sa love triangle sa tulo.
Giingong kadaghan na gipasidan-an ang biktima nga moundang na og samok-samok sa relasyon sa suspek ug sa ex-girlfriend niini apan wala mopatuo ang biktima.
Nasayran usab nga sa wala pa nahitabo ang insidente adunay nakakita nga gibaharan sa suspek ang biktima.
Gihulagway sa kapolisan nga base sa nag-viral nga video sa pagpamusil makita nga adunay intention ang suspek nga patyon ang biktima.
Subay niini, nakagawas na sa hospital ang menor de edad samtang anaa pa sa tambalanan si Kisses human makaangkon og samad pinusilan sa nagkadaiyang parte sa lawas.
Nasayran nga kalibre. 45 nga nga pistol ang gigamit sa suspetsado sa pagpamusil.
Nasuta nga ang suspetsado nadakpan kaniadto sa kasong pagpanulis ug pagkalambigit sa ilegal nga drugas.
Samtang ang biktima nadakpan usab kaniadto tungod sab sa ilegal nga drugas. (BANAT NEWS)