Nasinati nga kahuot sa trapiko sa SRP ipaimbestigar

CEBU, Philippines — Giaprobahan sa konseho sa Dakbayan sa Sugbo ang mga resolusyon nga giduso ni Konsehal Rey Gealon, chairman sa Traffic Management Committee aron malantaw ang hinungdan sa nasinati nga kahuot sa trapiko diha sa South Road Properties (SRP) niadtong nilabay ng Martes.

Gikataho nga adunay trailer truck nga naguba diha sa Cebu South Coastal Road diin nilanat ngadto sa upat ka oras ang kahuot sa dagan sa trapiko sa northbound vehicles. Ang maong trailer truck nga adunay dala nga 20-footer container van napalyar kini diha sa tunga-tunga sa viaduct section sa CSCR mga alas 5:00 sa buntag ug nakuha kini pasado na sa alas 10:00 sa buntag.

Si Gealaon, sa iyang resolusyon niawhag sa City Legal Office sa pag-imbestigar ug mopasaka og tukmang legal action batok sa drayber, owner o operator sa truck.

Si Gealon nagkanayon nga ang maong hitabo nakamugna og grabeng kahuot sa trapiko nga niresulta sa inconvenience, stress ug pagkalangan sa mga motorista.

Matud ni Gealon nga kinahanglang mopahigayon og imbestigasyon diin ang maong insidente nakaapekto kini sa ekonomiya, negosyo, panginabuhian sa mga motorista nga natanggong sa kahuot sa trapiko.

Ang konseho sa siyudad niawhag usab kini sa office of the mayor nga mopahamtang og administrative fines nga tukma sa pila ka oras nga ang truck nakabalda diha sa karsada.

Nunot niini, ang konseho sa siyudad niawhag sa Land Transportation office-7 nga mopahigayon og hugot nga operasyon batok sa mga drayber o operator sa non-roadworthy vehicles nga magbiyahe diha sa dagkong dalan ilabi na diha sa SRP coastal road  lakip ang viaduct ug tunnel .

Sa laing resolusyon, ang konseho sa siyudad niawhag sa Cebu City Traffic Office sa pag-allocate og exclusive resources-personnel ug vehicles alang lang sa SRP traffic management. The Freeman