CEBU, Philippines — Masaligon ang Police Regional Office 7 (PRO-7) nga lig-on ang ilang gisang-at nga kasong murder batok sa suspetsado sa kamatayon ni Rhea Mae Tocmo taliwala sa pag-plead not guilty niini atol sa arraignment sa korte.
Si Simeon Gabutero alyas "Gabro", ang gitumbok nga responsable sa pagpatay sa biktima niadtong Hulyo 17 sa milabay'ng tuig.
Kahinomduman si Tocmo, nakaplagan nga wala nay kinabuhi, gisulod og karton ug gilabay sa sitio Mohon, Barangay Tisa sa siyudad sa Sugbo.
Si Gabutero nasikop sa kapolisan niadtong Hulyo 29 sa nilabay nga tuig.
Matud ni Police Lieutenant Colonel Gerard Ace Pelare, tigpamaba sa PRO7, nga ang kapolisan adunay nahipos nga igong ebisensya gikan sa mga testigos, mga videos ug sa extrajudicial confession nga giluwatan sa suspetsado nga ilang nakuha pinasikad ang sakto nga proseso.
Gipasalig sa kapolisan nga adunay nakuha nga lig-ong ebisensya nga posibleng makakonbikto sa suspetsado sa maong krimen.
Masaligon kita nga adunay ta'y lig-on nga kaso nga makakonbikto sa suspetsado suma ni Pelare.
Si Pelare miingon nga normal lang nga mo recant ang usa ka suspetsado ug mo-plead not guilty sa usa ka krimen.
Dugang pa niya nga wala sila matandog ug mabalaka sa resulta sa maong arraignment ug magpadayon ang pag-hearing sa maong kaso taliwala sa pag-plead not guilty sa suspetsado. (BANAT NEWS)