CEBU, Philippines — Nagkahiusa karon ang Archdiocese of Cebu, Municipality sa Boljoon ug ang kagamhanan sa Probinsya sa Sugbo nga mabawi ug mabalik sa Archdiocesan Shrine of Patrocinio De Maria Santisima ang giingong mga kinawat nga pulpit panels nga anaa karon sa National Museum of the Philippines.
Dugay nang gikawat ang maong mga benditadong pulpit ug nasuta nga naa diay kini karon gi-display sa sulod sa National Museum of the Philippines.
Si Archbishop Jose Palma sa Archdiocese of Cebu mipadala na og suwat ngadto sa Director General sa NMP Jeremy Barns sa tinguha sa Simbahan nga makuha og balik ang pulpit panels.
Sumala pa sa Arsobispo ang mga pulpit panels gikuha gikan sa sulod sa simbahan nga walay pagtugot sa Local Ordinary sa panahon ni kanhi Archbishop Emeritus Ricardo J. Cardinal Vidal.
Walay opisyal nga rekord sa Archdiocesan Archives o bisan sa Chancery Office nga adunay request gikan sa kura paroko niadtong panahona nga i-deconsecrate ang pulpit panels nga maoy proseso kung ugaling tangtangon kini.
Wala hinuoy plano ang arsobispo nga kasohan ang mga tawong responsible sa pagtangtang sa mga pulpito apan nanghinaut siyang magsilbi kini nga leksyon sa tanang mga kaparian nga bantayan sa mga gitahas kanila nga mga butang sa Simbahan.
Ang simbahan nakadawat na usab og komukiasyon gikan sa National Museum of the Philippines nga bukas kini makigdayalogo sa simbahan ug sa provincial government.
Dugang usab sa Arsobispo nga nagkahinabi na usab sila sa pangulo sa National Historical Commission of the Philippines NHCP kinsa mipasalig kaniya nga mahibalik sa Simbahan ang maong mga panel sa pulpit.
Kung mahibalik kini sa simbahan ipahimutang kini pagbalik kung asa kini siya dapit gikuha ug aduna usab mga rito sa simbahan nga himoon bahin niini.
Ang Hunta Probinsiyal mipalabang og resolusyon nga nag-awhag sa MMP sa pagpauli sa pulpit panels sa Sugbo.
Samtang si Gob. Gwendolyn Garcia mipasalig nga tabangan ang simbahan nga mabantayan ang ilang mga kagamitan.
Samtang isip usa ka deboto ug usa ka Boljoanon, gikalipay ni Mayor Jojie Genesse Derama ang aksyon sa Simbahan ug sa Kapitolyo.
Tungod sab sa maong hitabo, tabangan sa lungsod ang simbahan nga mabutangan og CCTV camera ang dapit nga nahimutangan sa pulpito. -- IBM BANAT NEWS