CEBU, Philippines — Lain na usab nga pagsira sa mga dalan nga konektado sa Osmeña Boulevard sa Cebu City ang ipatuman tungod sa padayong konstruksyon sa Cebu Bus Rapid Transit project ilabi na gikan sa P. Del Rosario Street ngadto na sa R. Landon Streets.
Ang Cebu Bus Rapid Transit Management miingon nga ang pagsira nagsgugo kagahapong ug gipaabot nga buksan pagbalik ang trapiko sa maong dalan karong adlawa.
Ang sirado kini gikan sa alas-10 sa gabii hangtud sa alas-4 sa kaadlawon tungod sa pagtangtang sa atop sa Abellana-CNU Skywalk.
Dugang pa sa CBRT, gikan sa Pebrero 21 Miyerkules sa gabii ngadto na sa Domingo ipatuman ang full closure sa dapit tungod sa pagtangtang na sa main span sa skywalks ug ablihan balik na Lunes, Pebrero 26. Ang CBRT niawhag sa publiko sa pagsunod lang sa ilang gipahigayon nga re-rerouting scheme sa maong mga adlaw aron dili sila magproblema sa ilang mga lakaw.
Ang Cebu City Transportation Office adunay gipagawas nga rerouting schemes nga pagasundon sa mga motorista ilabi na kadtong gikan Fuente Rotunda padulong sa downtown Colon o Carbon agi sa Osmeña Boulevard.
Kinahanglan nga mo turn left ngadto sa R. Landon Street, turn right padung sa Junquera padulong padayon sa Colon; ang mga sakyanan gikan sa N. Bacalso Avenue ug Osmeña Blvd. (downtown) padulong sa uptown (Capitol ug Guadalupe) gikan sa N. Bacalso Avenue o Osmeña Blvd., adto mosubay P. Del Rosario Street, turn left ngadto sa P. Cui St., turn Left sa R.Landon Street ug lahos ngadto sa Osmeña Blvd.
Samtang sa mga sakyanan nga gikan sa N. Bacalso Avenue ug Osmeña Boulevard (downtown) nga padulong sa North (Lahug ug IT Park) gikan sa N. Bacalso ug Osmeña Blvd. mopadalong sila sa P. Del Rosario Street, turn left ngadto sa D. Jakosalem Street lahus ngadto na sa Gen. Maxilom Avenue.
Ang temporary road closure gihimo aron sa pagsiguro sa kaluwasan sa mga motorista ug publiko tungod sa nagpadayon nga pagtrabaho sa transportation infrastructure project sa Cebu City Government og sa DOTR. (BANAT NEWS)