Suspek sa pagpamusil nadakpan sa drug bust
CEBU, Philippines — Wala na makaipsot gikan sa mga tinugyanan sa balaod ang suspek sa nahitabong pagpamusil sa atubangan sa Pahina San Nicolas Barangay Hall, Cebu City niadtong Pebrero 1, 2024.
Wala damha nga madakpan ang 22-anyos nga suspek sa pagmusil sa gihimong buy-bust sa Sawang Calero Police Station 6 niadtong Domingo sa gabii diha sa Taboan, Barangay San Nicolas Proper, siyudad sa Sugbo. Ang 22-anyos, residente sa Sitio Urasi, Brgy. Sambag 1, usa kini ka High Value Individual. Nadakpan sab ang duha ka kauban niini nga 48-anyos ug 18- anyos.
Nakuhaan ang mga dinakpan og 30.12 grams nga shabu nga nagkantidad og kapin P200, 000 ug kalibre. 45 nga armas.
Sigon ni Police Major Francis Talosig, hepe sa Sawang Calero Police Station 6, ang 22-anyos ilang napasakaan og kasong frustrated homicide subay na shooting incident nga nahitabo pag Pebrero 1 human positibo kining maoy giila sa biktima nga maoy nagpusil niya.
Giingong maldito sa dapit ang dinakpan ug gani naalarmahan kini sa kapulisan sa miaging semana nga nagdala og armas.
Gipalit ra matud pa niya ang armas ug magbitbit kini kay kung dunay manabla sa ilang negosyo nga illegal nga drugas panghadlukon ug matud pa pamatyon. (BANAT NEWS)
- Latest
