CEBU, Philippines — Mokabat sa kapin sa P25 million nga balor sa proyekto ang pormal na nga gitugyan sa kagamhanan sa dakbayan pinaagi sa Department of Engineering and Public Works (DEPW) ngadto sa lain-laing barangay.
Si Engr. Liova Gabriel, pangu sa DEPW’s construction services division, mitug-an pinaagi sa Sugboanon channel nga ang maong mga proyekto kadaghanan naglangkub sa road concreting kun pag semento sa karsada ubos sa mga barangay sa Suba, Pasil, ug Tisa.
Gipahibawo sa DEPW nga ang bag-ong gisemento nga karsada diha sa Pasil nikantidad og P5 million; P14.1 million sa Suba; ug P3.8 million sa barangay Tisa.
Si Pasil barangay captain Francisco De Gracia, Jr. mipadayag sa iyang pasalamat kang mayor Rama tungod kay ang maong proyekto makatabang og daku sa mga residente. “Swerte kaayo ta nga duna ta’y Mayor (Mike Rama) nga mapinanggaon natong tanan. Tanan natong mga barangay duna gyud aning mga concreting projects,” suma pa ni de Gracia.
Giturn over usab niadtong Pebrero 15, ang giayo na nga Basak San Nicolas Health Center ug ang naayo na usab nga materials recovery facility (MRF) diha sa Basak Pardo.
Ang mayor maoy nangulo sa turnover sa giayo nga health center diha sa barangay Basak San Nicolas nga nigasto og P1.4 million, ingon man sa MRF sa Basak Pardo, nga gigahinan og pundo nga P1 million.
Mitambong usab sa turn-over si Basak Pardo barangay captain Dave Tumulak kinsa miingon nga gamiton sa barangay ang MRF aron sa pagproseso sa reusable waste o recyclables alang sa compost.
Si Rama, sa iyang mensahe atol sa turn over sa mga proyekto mipasalig nga mohatag ug dugang road projects nga dunay drainage systems sa tanang barangay sa siyudad pinaagi sa iyang Operation Dugtong program. Gikan sa The Freeman MEL BANAT NEWS