Oplan Disiplina gipatuman sa tulo ka barangay

CEBU, Philippines — Gipatuman sa Cebu City Police Office (CCPO) uban ang kagamhanan sa Siyudad sa Sugbo ang Oplan Disiplina sa tulo ka barangay sa siyudad kagahapon sa buntag.

Kahinumduman nga si Cebu City Mayor Michael Rama nagpagawas og executive order nga gitawag og Oplan Disiplina nga gilangkuban dili lang sa kapulisan apan apil na ang ubang departamento sa Cebu City Government nga in-charge sa safety ug security.

Ang Oplan Disiplina pagpatuman kini sa mga ordinansa sa siyudad nga makatabang sa pagpatunhay sa kahapsay ug kalinaw sa Cebu City.

Kagahapon, ang Oplan Disiplina gihimo sa Barangay Tejero, Tinago ug San Roque diin gihawanan nila ang mga nakababag sa dalan. 

Apil sab niini ang pagbadlong anang mga tawo nga anha mag-inom sa karsada, kasagaran duol o atubangan sa mga tindahan diin nila gipalit ang ilang giinom nga bino.

Giangkon sa kapulisan nga hagit gyud nila kun unsaon nga mamentinar kini hinungdan nga nakig-alayon sila sa mga Barangay Officials aron makatabang nga magpadayon ang program.

"Mao na nihangyo atong City Director isip supervisor sa implementation or Oplan Disiplina sa Task Force Oplan Disiplina naghangyo atong City Director Police Colonel Ireneo Dalogdog atong mga Barangay Officials gihangyo nato ilang active participation especially sa maintenance anang nasugdan nga proyekto," ni Rafter pa.

Gipaabot nga naa pay laing mga Barangay sa Cebu City nga ipatuman ang Oplan Disiplina. (BANAT NEWS)