CEBU, Philippines — Dili mominos sa tulo ka mga bitin ang na rescue sa Barangay Umapad sa Dakbayan sa Mandaue sumala pa ni Architect Aracelli Barlam, pangulo sa Mandaue City Environment Office.
Matud pa ni Barlam, sa duha ka adlaw nga milabay, tulo ka bitin ang ilang na rescue. Naglakip niini ang python nga nakuha sa electric post duol sa transformer alas -8 sa buntag adlaw nga Huwebes.
Tungod aning mga insidenteng dunay mga nakitang mga bitin bisan sa mga komunidad, giawhag sa CENRO ang katawhan nga dili kini pasakitan o patyon.
Kung aduna silay makit-an nga mga bitin sa ilang mga dapit ipahibalo kini dayon sa ilang mga barangay officials tungod kay sila na ang mohimo sa pag rescue niini dayon ihatud sa ilang buhaton ug i-turn over usab kini nila sa DENR-CENRO.
Dugang pa ni Barlam, angay dili gayud magmaisugon ang katawhan sa pag-rescue sa mga bitin tungod kay aduna gayud mga eksperto pagdakop niini aron malikay sila sa risgo ug sa samang higayon dili mapasipad-an ang mananap.
Gitug-an ni Barlam, ang mga na rescue ilaha na kining giturn-over ngadto sa DENR ug wala sila masayod unsang klase nga bitin ang duha kini tungod kay gisulod kini sa sako nga niabot sa ilang buhatan ug ilaha gilayon kini gihatag sa tukma nga ahensya.
Si Barlam, wala masayod kung unsay hinungdan sa presensya sa mga bitin sa Barangay Umapad tungod kay unang higayon man kini nga ilang nasinati sa maong dapit sulod sa duha ka adlaw tulo gilayon ang na rescue.
Giawhag ni Barlam ang katawhan nga magmatngon sa kanunay ug dili mokompiyansa sa mga bitin. (BANAT NEWS)