Mga unggoy sa sirao makahatag og atraksyon sa lugar

CEBU, Philippines — Pagpatim-aw sa mga Unggoy sa Sirao Proper, Barangay Sirao, bukirang bahin sa Dakbayan sa Sugbo, gipaabot nga makahatag og dugang atraksyon sa maong dapit, tupad sa gitukod nga iconic structure sa Divine Mercy sa maong dapit.

Ang tigpakaon sa maong mga unggoy nga si Josie Mabano, nitug-an nga bata pa sila nakadungog na sila nga adunay giingong unggoy sa maong dapit apan wala silay makit-an.

Niadtong Octobre 5, 2021 sa dihang nisaka siya sa maong dapit alang sa pagpamaligya sa mga nagtrabaho sa area didto nakakita siya sa presensya sa duha ka unggoy lang, hinungdan iyaha kining gibutangan og pagkaon ug nipasabot nga kung kuhaon kini iyaha kining lawgan kanunay.

Gitug-an ni Mabano, sukad niadto ang duha nahimo nang lima hangtud karon dili mominos moabot na siguro sa 50 ka buok kapin o kulang.

Ang pagpakaon niya sa mga unggoy nakapalipay kini sa pipila ka mag-uuma tungod kay dili na kini manghilabot sa ilang mga tanom.

Si Mabano, nitug-an nga malipay lang gayud siya nga adunay mosaka sa maong dapit ilabi na adunay bitbit nga pagkaon tungod kay makatabang kini kaniya nga dili na mangita og pamaagi aron mapakaon ang mga unggoy.

Nanghinaut si Mabano nga pinaagi sa pagbisita ni Konsehal Jun Alcover mahatagan og pagtagad sa siyudad ang maong mga unggoy ilabi na sa ilang pagkaon.

Si Kapitan Felix Limotan, sa Barangay Sirao nitug-an nga mohimo pa siya og pakisusi sa maong dapit ilabi na bag-o pa siyang nilingkod isip amahan sa barangay.

Makigtagbo siya sa mga tag-iya og luna sa maong dapit tungod kay pribado kini aron masuta usab nila kung asa dapita sila sa barangay makatabang aron mahimong luwas ang mga mobisita sa maong dapit.

Gibutyag ni Limotan, nga wala man gayud silay budget sa barangay hinungdan nga wala gayud silay mahatag para sa pagkaon sa mga unggoy.

Si Rainier Manlegro, pangulo sa Wild Life Monitoring Unit Enforcement, DENR Central Visayas, nitug-an nga kinahanglan gayud i-assist sa DENR ang maong mga unggoy ilabi na kung kini naa sa wild. Ang DENR mohimo ug pakisusi sa maong dapit aron ilang sayran ang maong mga unggoy, pila kini sila kabuok og unsa usab ang ilang estado. (BANAT NEWS)