“Kadiwa ng Pangulo” gilusad sa dakbayan sa Mandaue

CEBU, Philippines — Gilusad sa kagamhanan sa siyudad sa Mandaue ang labing unang "Kadiwa ng Pangulo” kagahapon sa buntag Pebrero 15, 2024 sa Mandaue City Hall Ground sa Barangay Centro sa maong dakbayan.

Si Bise Mayor Glenn Bercede uban sa mga sakop sa konseho maoy nangulo sa paglusad niini.

Gipahiluna sa maong lugar ang one-stop-shop center nga nagladlad sa lokal nga produkto nga gihimo sa mga persons deprived of liberty (PDLs) o mga binilanggo sa Mandaue City Jail.

Lakip sa mga lokal nga produkto nga giladlad mao ang nagkadaiyang mga utanon ug sabon nga gibaligya lamang sa barato nga presyo.

Si Sharon Mangadlao nga maoy officer-in-charge sa City Agriculture Office miingon nga ang pagladlad sa maong mga lokal nga produkto magsugod sa alas 8 ang takna sa buntag hangtod kini sa alas 5 sa hapon.

Dugang pa ni Mangadlao giplano karon sa kagamhanan sa Dakbayan sa Mandaue sa pag -institutionalized sa pagpasiugda sa Kadiwa ng Pangulo centers sa matag petsa 15 ug petsa 30 sa matag bulan pinaagi sa ipalabang nga ordinansahon sa mga sakop sa konseho sa dakbayan. (BANAT NEWS)