Magtiayon sa Lapu-Lapu nakuhaag shabu

CEBU, Philippines — Nadakpan sa kapolisan sa Lapu-Lapu City ang magtiayon nga gipasanginlang namaligya og ilegal nga drugas sa operasyon nga gilusad sa Presinto 5  sa Lapu-Lapu City Police Office  (LCPO)  alas 9  pasado ang takna sa miaging gabii.

Ang nadakpan mao sila si Lizard ug Bianca (apelyido gipugnan) nga pulos hingkod ang panuigon ug nagpuyo sa Barangay Pusok  sa maong dakbayan

Si Police Major Ramil Dugan, hepe sa Presinto 5 sa LCPO miingon nga nakadawat sila og impomasyon labot modus sa duha maong gilusad ang operasyon.

Nakuha gikan sa duha ang duha ka paketeng shabu ug usa ka armas nga kalibre .22 uban sa duha ka bala niini.

Samtang tulo ang nadakpan sa kapolisan sa Medellin Police Station sa Sitio Dawis, Barangay Lamintak Norte, Medellin Cebu, Sabado sa kaadlawon.

Ang mga dinakpan mao sila Rey Romagot, 31, samtang ang duha nga dinakpan nga magparyente mao sila Randi Ortega, 52, ug si Pepeng Ortega, 53.

Nakompiskar gikan sa tulo ang duha (2) ka dako nga pakite nga gituohang shabu, lima (5) ka gamay nga pakite nga mokantidad og P88,400 ug ang buy bust money  ug kwartang halin sa illegal nga drugas ug usa ka armas.38 revolver nga dunay mga bala.

Ang  operasyon gipangulohan ni Police Major Timothy Jim M. Romanillos inubanan sa kapolisan sa Medellin Police Station.

Ang mga dinakpan anaa na karon sa kostudiya sa kapolisan sa Medellin samtang giandam na ang kasong ipasaka nga  kalapasan sa Sec.5 ug Sec.11 sa Art. II sa R.A 9165 ug Kasong kalapasan sa RA 10591 Comprehensive Firearms and ammunition Regulation Act. — /IBM (BANAT NEWS)