CEBU, Philippines — Duha patay samtang usa samdan sa nahitabong pagpamusil diha sa Sitio Rattan, Barangay Sacsac, Lungsod sa Pinamungahan niadtong Martes sa gabii.
Gikataho nga upat ang biktima sa pagpamusil nga gilangkuban nila ni Artemio Hernani Traya, 48-anyos ug asawa niini nga si Sarlina, 47; Chyra Esguerra Traya, 22- anyos ug kapuyo niini nga si Charlie Diacamus Candelasa, 25-anyos.
Ang magtiayong Artemio ug Sarlina patay na kini nga naabot sa Pinamungahan District Hospital samtang si Chyra naangol kini.
Si Chyra nakaangkon og samad pinusilan sa iyang tiyan samtang si Charlie wala maigo sa maong pagpamusil.
Ang suspetsado mao ang manag-uyoan nga Arnold ug Arjie Ignario, silingan sa mga biktima.
Base sa report sa Pinamungahan Police Station nga si Stephanie Yongco ang nanawag sa police station ug nagpahibawo nga adunay pagpamusil nga nahitabo sa maong lugar ug dali nga niresponde and kapolisan.
Base sa imbestigasyon sa kapolisan nasuta nga si Artemio nakig-inom sa mga suspetsado.
Si Chyra ug si Charlie ang nibadlong sa mga suspetsado nga moundang na sa inom tungod kay nakadisturbo na kini sa mga silingan.
Apan si Arnold giingong nasuko ug kalit nga nibunot og armas ug gipusil si Charlie apan wala maigo ug gisunod sa pagpusil sa suspetsado si Chyra.
Samtang si Arjie ang nipusil nila ni Sarlina nga naigo sa tiyan ug Artemio nga naigo dughan.
Human sa hitabo daling nisibat ang mga suspetsado ug padayon pa kining gipangita sa kapolisan.
Sa laing bahin, patay diha-diha ang usa ka bayot kinsa giingong namaligya og ginadiling drugas human kini pusila sa wala mailhing kriminal diha sa Sitio Kilawan, Barangay Tanke, Dakbayan sa Talisay kagahapon sa kadlawon.
Ang biktima nailhan nga si Jason Dejacto, hingkod ang panuigon, nagpuyo sa maong lugar naglingkod sa e-bike sa wala pa kini pusila.
Usa sa mga residente sa lugar nibutyag ngadto sa kapolisan nga samtang nag-inom siya og kape nakadungog siya og sipang buto ug nakita na lang niya ang biktima nga nagtuwad na diha sa e-bike.
Si Police Lieutenant Colonel Wayne Magbanua, pangulo sa Talisay City Police Station nibutyag nga usa sa mga target nila si Dejacto sa ilang operasyon batok ginadiling drugas ug nakadawat sila og taho nga nakadispalko kini og ilegal nga drugas.
Ang kapolisan nagpahigayon og imbestigasyon sa maong hitabo. (BANAT NEWS)