CEBU, Philippines — Gitugyan sa Guadalupe Police Station ang color gray nga Sports Utility Vehicle (SUV) nga giingong maoy naka-hit and run kang Jeslar Uriel Larumbe diha duol sa Redemptorist Church, Barangay Kamputhaw, Siyudad sa Sugbo niadtong Domingo. Matud ni Police Lieutenant Colonel Janette Rafter, deputy city director for operations sa Cebu City Police Office (CCPO) nga nakig-alayon sila sa tag-iya sa sakyanan alang sa imbestigasyon nga himuon tungod kay ilang nasubay nga ang sakyanan anaa sa dapit dihang nahitabo ang hit and run.
Kini base sa mga footage sa close circuit television (CCTV) ug sa mga saksi.
Ang tag-iya sa sakyanan kinsa dili magpahingan ang nitugyan sa sakyanan ngadto sa kapolisan isip pagpakita sa ilang kooperasyon sa imbestigasyon.
Giklaro sa tag-iya nga dili abandonado ang sakyanan sukwahi sa nikatap nga taho diha sa social media.
"Na-shock nalang mi nganong gi-report ang sakyanan nga recovered or abandon that we'd like to clarify, that wala na namo gibuhat, wala pod na nahitabo", matud sa tag-iya. Ang tag-iya sa sakyanan nagkanayon Domingo sa buntag wala siya nilakaw ug wala siya niadto sa may Redemptorist Church.
Ug gabii sa adlaw'ng Sabado nilakaw siya tungod kay adunay gipalit ug adunay giatiman sa negosyo niya nga freelance.
Matud sa tag-iya nga pag-uli niya nag-commute ra siya ug natulog sa balay dayon pagka-Domingo sa buntag nimata siya, nagkuha sa sakyanan nga gi-parking diha sa may health center sa barangay ug gidala diha sa may dalan Kabajar dayon nagpakaon siya sa ilang mga binuhing iring ug natulog og balik.
Gibutyag sa tag-iya nga aduna siya y suod nga amiga ug business partner nga gihatagan og duplicate sa yawe sa sakyanan niadtong 2021 ngadto na sa tuig 2022 ug gi-contact na niya kini aron pag-verify kong nigamit ba kini sa sakyanan.
Niangkon usab kini nga ang sakyanan niya adunay blinker ug wangwang kaniadto apan dugay na kini nga wala nag-function.
Samtang si Rafter nagkanayon nga sama sa uban gusto usab nila nga masulbad dayon ang kaso ni Larumbe apan dili nila dali-dalion ang kaso aron dili mausik ang ilang paningkamot nga mahatagan og hustisya ang biktima.
Sa laing bahin, si Konsehal Rey Gealon, chairman sa Committee on Laws ug kasamtangan nga pangulo sa Traffic Management Council nagtinguha nga moumol og local ordinance kalabot sa anti-wangwang.
Matud ni Gealon nga adunay daghan karong mga sakyanan bisan mga pribado ang nigamit og wangwang, siren ug blinkers nga usahay mga gara kaayo diha sa kadalanan. (BANAT NEWS)