Rama: Gitudlo nga BOD sa MCWD kinahanglang bayaran sa honorarium

CEBU, Philippines — Si Cebu City Mayor Michael Rama nipadayag nga ang iyang gitudlo nga set sa Metro Cebu Water District (MCWD) board kinahanglan nga bayaran sa ilang katungod nga honorarium.

Sa gipahigayong press conference kagahapon, si Rama nagkanayon nga karon nga napasaka na ang kaso nga Usurpation of Authority ilaha na nga itugyan ang overseeing ngadto kang Atty. Collin Rosell, city administrator.

Matud ni Rama nga igo na nga nasayod ang city administrator sa nahitabo ug sa angayang lihokon.

Ang mga gitudlo nga BOD gilangkuban nila ni Mel Feliciano, chairman, Atty. Aristotle Batuhan ug Nelson Yuballos ug matud ni Rama nga angayan nga hatagan kini og mga honorarium.

 Si Rama nagkanayon nga si Felicinao ug ang duha pa kinahanglan nga mabayaran sa ilang mga honorarium tungod kay mga legitimate kini nga mga miyembro sa board.

Sa pagkakaron, giila sa mga empleyado sa MCWD si Attorney Jose Daluz III isip kasamtangang chairman kauban ang mga sakop sa BOD nga sila si Miguelito Pato ug Jodelyn Seno.

Niadtong Oktubre 31, 2023 nimando si Rama sa pagpatangtang nila ni Daluz isip chairman ug mga sakop sa BOD.

Samtang si Feliciano nangangkon nga wala pa sila’y nadawat nga honorarium ug nagpaabot pa sila sa kompirmasyon sa Local Water Utilities Administration (LWUA) kabahin sa ilang appointment ug wala pa usab kini mahisgoti.

Matud ni Feliciano nga maggikan sa MCWD ang honorarium ug sa pagkakaron nagpahigayon sila og mga board meeting sa gawas sa MCWD headquarter samtang nagpaabot sa desisyon sa LWUA.

Ug kabahin sa gisang-at nga mga kaso nga Usurpation of authority batok kang Daluz ug laing duha ka board members, si Feliciano nagkanayon nga kini long overdue kaniadto pa nga si Rama ang adunay appointing power sa pagtangtang.

Gikataho nga sila si MCWD board members Danilo Ortiz ug Earl Bonachita nisang-at sa mga reklamong kriminal batok nila ni Daluz, Pato ug Seno ngadto sa Cebu City Prosecutor’s Office niadtong Enero 31 niining tuiga.

Matud usab ni Feliciano nga ang maong reklamo gisuportahan sa hukom sa Regional Trial Court (RTC) ug sa nangaging mga aksyon sa LWUA.

Sa iyang bahin, si Daluz nagkanayon nga wala pa siya’y kopya sa reklamo ug nangangkon nga usa kini ka harassment.

“That's purely harassment...We will answer them when we get a copy”, dugang ni Daluz. BDB BANAT NEWS