CEBU, Philippines — Nasikop sa Criminal Investigation and Detection Group (CIDG) Mandaue City Field Unit pinaagi sa search warrant ang usa ka Barangay Peacekeeping Action Team (BPAT) sa Barangay Basak, Lungsod sa Compostela, pasado alas 4 sa kadlawon kagahapon didto sa Purok Kawayan sakop sa Barangay Compostela sa maong Lungsod.
Ang dinakpan mao si Dennis Pareja Yonco, 39 anyos, residente sa naasoy nga lugar.
Sa report sa kapulisan ang dinakpan nagtenir og calibre .357 revolver ug mga bala og giingong magpasalba kini kun makainom nga naghatag og kahadlok sa mga residente sa barangay.
Hinungdan ang CIDG Mandaue City Field Unit naghimo og validation, casing ug surveillance ug nasuta nila nga tinuod ang report hinungdan nga ni-apply sila og search warrant. Ang search warrant gi-issue ni Executive Judge Allan Francisco Garciano.
Nasakmit gikan sa dinakpan ang usa ka calibre .357 revolver ug unom ka buhing bala.
Samtang sa laing bahin nabalhog na karon sa bilanggoan ang giilang Top 8 nga most wanted person (MWP) sa Regional Level human kini madakpi sa kapolisan sa Presinto 3 sa Lapu-Lapu City Police Office.
Ang team nga gipangulohan ni Police Major Jaypee Dagami, hepe sa Presinto 3 sa LCPO mao ang nakadakop sa maong wanted nga giila lamang sa alyas nga Dodoy, 28 anyos nga nagpuyo sa New Paradise sa Barangay Pajo, siyudad sa Lapu-Lapu.
Matud pa ni Dagami nga nag-atubang og kaso nga kalapasan sa paghupot og pagbaligya og ilegal nga drugas ang dinakpan ug nalutsan kini og warrant of arrest sa korte. MEL BANAT NEWS