2,354 ka tawo sikop atol sa usa ka semana nga operasyon

CEBU, Philippines — Nadakpan sa usa ka semana nga operasyon sa Lapu-Lapu City Police Office (LCPO) ang 2,354 ka two nga adunay mga nahimong kalapasan sa ordinansa sa Dakbayan sa Lapu-Lapu.

Ang maong operasyon gipahigayon niadtong Enero 21 hangtud sa Enero 27, 2024.

Si Police Lieutenant Colonel Christian Torres, tigpamaba sa LCPO nagkanayon nga naglakip sa mga lokal nga ordinansa sa siyudad nga nalapas sa mga nangadakpan mao ang ordinansa sa trapiko, pag-inom og ilimnong makahubog diha sa publiko, pagsuroy-suroy nga hubo ang ibabaw nga bahin sa lawas ug ingon man ang pagpanigarilyo  diha sa publikong lugar.

Matud ni Torres nga  ang maong gidaghanon sa mga nadakpan resulta kini sa 398 nila ka operasyon.

Ug dugang nilang gihingusgan sa pagpatuman mao ang curfew ordinance sa mga menor de edad ubay-ubay usab ang ilang na-rescue nga mga menor kinsa ilang masigpatan nga nagsuroy-suroy nga lapas na sa alas 10:00 sa gabii.

Ang oras sa curfew magsugod sa alas 10:00 sa gabii hangtud sa alas 4:00 sa kadlawon.

Dugang ni Torres nga ang makalapas sa lokal nga ordinansa aduna kini tukmang multa. BDB BANAT NEWS