Naligsan og wing van, patay

CEBU, Philippines — Usa ang patay sa aksidente sa kadalanan sa Dakbayan sa Talisay ug nakamugna sab og grabeng traffic sa Lungsod sa Minglanilla kagahapong adlawa ug niadtong hapon sa nakalabay nga adlaw’ng Lunes tungod niini.

Patay diha-diha si Walter Castañares taga Barangay Candulawan human siya nalatayan og wing van diha sa Cebu South Coastal Road (CSCR) sa Barangay Cansojong sa maong siyudad kagahapon sa hapon.

Si Jonathan Tumulak, pangu sa CT-TODA sa ilang pakisusi uban sa kapolisan nasuta nga nagmaneho og motorsiklo paingon sa habagatan ang biktima diha sa inner lane.

Nagsunod kaniya ang wing van nga naa sa middle lane apan giingong nalatayan niini ang biktima. Wala giklaro kun giunsa pagkahitabo nga nagkaabot ang duha.

 Ang CT-TODA ug kapolisan padayon pa sa ilang pag imbistigar sa tinud-anay nga nahitabo nga disgrasya. Samtang gikostudiya na sa kapolisan ang drayber sa wing van.

Sa laing insidente, usa ka truck bed nga nagkarga og backhoe ang nawad-an og brakes samtang nagdagan kini diha sa Natalio Bacalso Avenue sa Barangay Pakigne sa lungsod sa Minglanilla niadtong Lunes sa hapon.

Ang mga sakop sa Minglanilla Traffic Commission (MITCOM) migukod sa maong trak aron kini pahunongon.

Si Glenn Antigua, pangu sa MITCOM miingon nga niabot sa 300 metros nga nagdagan ang truck bed una pa kini nihunong sa tungason nga bahin sa karsada.

Gialihan og dakong kahoy ang luyo nga bahin sa truck aron di na kini makasibog pa.

Ang drayber niingon nga nawagtangan og brake ang truck ug nasuta gyud nga naguba ang hydro-box niini. Tungod niini na-traffic og maayo sa lugar hangtud sa alas-8 sa gabii.

Gikan sa amihanan paingon sa habagatan ang truck aron ihatud ang backhoe.

Si Antigua miisyu og citation sa drayber aron magsilbi kini nila nga leksyon nga susihon gyud ang kondisyon sa sakyanan sa di pa kini gamiton. Wala ra hinuoy nasakitan sa maong insidente. IBM BANAT NEWS