CEBU, Philippines — Gidagsaan sa mga Mandauehanon nga unang adlaw sa gipahigayong Medical, Surgical ug Dental Mission nga gipasiugdahan sa kagamhanan sa siyudad sa Mandaue uban sa pribadong sektor.
Ang maong kalihukan milungtad og upat ka adlaw nga gisugdan niadtong Lunes Enero 28 ug matapos kini karong adlawa, Enero 31, 2024.
Gihimo kini diha sa Mandaue City Sports and Cultural Complex sa sitio Tribunal sa Barangay Centro sa maong dakbayan nga gidugokan sa mga molopyo sa kabarangayan.
Naglakip sa mga pribadong sektor nga nakighiusa sa pagpahigayon sa maong medical, surgical ug dental mission mao ang Mandaue City Chamber of Commerce and Industry (MCCI), Philippine Medical Association of Michigan nga maoy nagpasiugda sa libre nga serbisyo.
Si Mandaue City Mayor Jonas Cortes kinsa hugot nga misuporta sa medical mission miingon nga angayan hatagan og unang pagtagad ang maayong kahimtang sa panglawas sa mga Mandauehanon.
Niabag usab sa kalihukan mao ang University of Cebu Medical Center (UCMED) uban usab niini ang Kaabag Mandaue nga gipangulohan ni Victoia Cortes ingon man ang Skeptron Marshalls.
Gipaningkamotan sa mga organizer nga mahimong hapsay ang pamaagi sa pag-alagad sa maong medical mission, gikan sa validation sa registration ingon man pagkuha og vital signs, sa pagpahigayon sa medical consultation ug paghimo na gyod sa procedure sa mga minor surgery, ug ang pagpanghatag og tambal.
Samtang nagpasalamat sa kagamhanan sa Mandaue City si Dr. Emmanuel Dizon, ang Presidente sa Philippine Medical Association of Michigan, ug apil sa gipasalamatan ang mga tawo o pundok nga nakatabang sa kalamposan niini. Nisuporta usab sa kalihokan ang The Freeman pinaagi sa gihimong feeding ingon man ang CDRRMO ug Mandaue City Police Office. MEL BANAT NEWS