CEBU, Philippines — Nibisita kagahapon dinhi sa Sugbo si United Nations Special Rapporteur (UNSR) on freedom of opinion and expression Irene Khan alang sa pag-assess sa mekanismo sa gobyerno kabahin sa human rights ilabi na sa freedom of opinion and expression.
Niabot si Khan sa Police Regional Office (PRO)-7 diin didto gipahigayon ang panagtagbo sa mga miyembro sa Cebu Citizen’s Press Council, Cebu Federation of Beat Journalists ug kapolisan.
Gipangutana ang mga tigbalita kun duna ba sila’y kasinatian nga daw nalapas ang ilang tawhanong katungod o na-harass sila ilabi na sa pagkuha og balita. Gi-presentar sab sa PRO-7 ang ilang mga programa nga gipatuman sukad niadtong tuig 2022 hangtud karong tuiga nga nag-highlight sa trabaho sa kababayen-an nga mga uniformed personnel nga mao ang women empowerment.
Apil sab sa gipresentar mao ang 83 ka lihok protesta nga ilang na-monitor sukad sa 2022 diin wala’y gidakop nila dungan sa pagpasabot sa UN Human Rights Rapporteur nga gipatuman gyud nila ang maximum tolerance.
Gipasigarbo usab nila ang pag-atiman sa Person Under Police Custody diin gisusi ang kahimtang sa ilang panglawas ug nga sila transparent sa mga tigbalita nga kun dunay kahiwian nga nahimo ang ilang personnel dili sila magpakahilom ug moatubang gyud sila sa publiko.
Matod ni Atty. Hue Jyro Go, Chief of Staff sa Presidential Task Force on Media Security (PTFOMS) nga natagbaw si Khan sa maayong relasyon sa kapolisan ug sa mga tigbalita sa Probinsiya sa Sugbo.
Gipahibawo ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga mohimo sila og dugang panagtigom uban ang mga tigbalita aron mas molig-on pa ang relasyon sa duha ka habig.
Ang Presidente sa Cebu Federation of Beat Journalist Arnold Bustamante mihulagway nga buhi gihapon ang press freedom sa Probinsiya sa Sugbo ug ang mga tigbalita wala pugngi sa pagpadayag sa unsay tinuod.
“Ang press freedom buhi pa gihapon, wala ta ka experience nga gibaatan atong mga baba, gigapos atong mga kamot sa pagsuwat sa tinood nga mga impormasyon kung dunay mga kahiwian nga nahimo atong kapulisan, ang atong opisyal sa gobyerno free ta nga mosuwat niini”, ni Bustamante pa.
Karong adlawa nibalik sa Manila si Khan diin duna kini lecture sa Ateneo Law School may labot sa International Human Rights. (BANAT NEWS)