Di na patan-aw sa cellphone, nangabit na diay

CEBU, Philippines — Gidakop sa kapulisan sa San Fernando Police Station ang usa ka bana human kini gireklamo sa iyang asawa kay nasakpan nga ni check-in sa usa ka lodging house diha sa Barangay Pitalo, Lungsod sa San Fernando,  niadtong Domingo sa gabii, Enero 28, 2024. Ang asawa nga nag-edad og 38 anyos nidangop sa kapulisan kay nakita niini ang motorsiklo sa iyang bana nga 38 anyos sab sa usa ka lodging house sa maong lungsod.

Matud ni Police Major Mark Anthony Villanueva, hepe sa San Fernando Police Station sa pakig-estorya kaniya sa asawa, kini miingon nga niadtong Disyembre pa lang sa miaging tuig nagduda na kini nga dunay laing karelasyon ang bana niini.

Nagsugod iyang pagduda kay dili na kini mosugot nga iyang basahon ang cellphone sa bana, unya duna say panahon nga dugay na kini mouli, daghan kini og pasumangil ug dali na masuko.

“Gi-escort tan sa atong kapulisan ang biktima and nag-coordinate mi sa management sa lodging house, gi-timing namo nga naghatag og sukli ang gabantay sa lodging house then pag-open mao na ‘to nisulod atong kapulisan kuyog ang asawa, naabtan nato sila sulod sa kwarto…Wala sila gahubo,” sigon ni Villanueva.

Mihimakak pa pag-una ang bana ug ang giingong babaye niini nga kauban ra sab niya sa trabaho apan kadugayan nangayo ra sila og pasaylo sa asawa nga diin duna kini duha ka anak.

Apan kagahapon gisang-at na sa piskalya ang kasong concubinage batok sa bana ug sa babaye niini. (BANAT NEWS)