Dul-an P7 milyong shabu nasakmit
![Dul-an P7 milyong shabu nasakmit](https://media.philstar.com/photos/2024/01/28/5_2024-01-28_23-06-16.jpg)
CEBU, Philippines — Mikabat sa P6.9 milyones nga balor sa ilegal nga drugas ang nasakmit sa managlahi nga buy-bust operation sa kapulisan sa Siyudad sa Talisay ug Siyudad sa Sugbo niadtong Sabado ug kagahapon adlaw nga Domingo.
Pasado alas 8 sa gabii adlaw nga Sabado, Enero 27, nadakpan sa Talisay City Police Station ang tulo ka indibidwal apil niini ang ilang target sa operasyon nga si Niño Zabala Oca, 41.
Apil sa gidakop sila si Annalou Ebrado Mabuyo, 38; ug Rochelle Gaviola Cabardo, 37, ang tulo pulos taga Barangay Tangke.
Ang mga dinakpan nakuhaan og 350 gramos sa gituohang shabu nga mobalor og P2,380,000.
Samtang pasado alas 9 sa gabii sa samang adlaw, nadakpan sab sa Abellana sa Police Station 2 sa Cebu City Police Office ang laing High Value Individual sa Sitio Lower Kawayan, Barangay Sambag, Cebu City.
Ang nadakpan mao si Jeffrey Robin Pabalate alyas Jimboy, 28,nagpuyo sa Belgium Street, Barangay Suba.
Nakuhaan kini og 500 gramos sa gituohang shabu nga nagkantidad og P3,400,000 million.
Dayon pag adlaw'ng Domingo, Enero 28, nasikop sa City Drug Enforcement Unit sa Cebu City Police Office ang duha ka high value ug street level individual sa Barangay Guadalupe sa Siyudad sa Sugbu.
Ang mga nadakpan mao si Reneboy Maloloy-on Remorosa alyas Sarko, 36, nagpuyo sa Sitio Manggahan, Barangay Guadalupe ug Britz Patigayon Geraldizo alyas Ji-Ji, 33, residente sa Tangkungan, Barangay Basak Pardo.
Nakuhaan sila og 165 gramos sa gituohang shabu nga mobalor ohg P1,122,000.
Si Police Regional Office-7 Director Brigadier General Anthony Aberin nalipay sa kalamposan sa iiyang mga sakop sa wala'y paglugak nga operasyon sa kapulisan batok sa ilegal nga drugas.
Gikatakda nga pasakaan og kasong paghupot ug pagpamaligya og illegal nga drugas ang mga dinakpan. — /IBM (BANAT NEWS)
- Latest