CEBU, Philippines — Miulbo ang usa ka sunog diha sa Sitio San Juan, Brgy. Sambag 2, sa Dakbayan sa Sugbo, Biyernes sa hapon, Enero 26, 2024.
Gibanabana anaa sa 10 ka panimalay ang naigo sa maong sunog nga gialarma pasado alas-4 sa hapon.
Hinuon napawong kini sa hingpit alas 5:12 sa hapon.
Way gikatahong nakalas sa maong insidente samtang padayon pa ang gihimong imbestigasyon sa kabomberohan sa hinungdan sa pag-ulbo sa kalayo.
Sa pikas bahin, usa ka bush fire sab ang girespondehan sa kabomberohan sa lungsod sa Cordova diha sa kilid sa may CCLEX access road sa Barangay Gabi pasado alas -12 sa udto.
Laing bush fire sab ang miulbo sa Sitio Kaluwasan, Barangay Inayawan sa Cebu City sumala pa ni Kapitan Kirk Bryan Jaca Repollo. Ang maong sunog matud pa nagsugod sa daob sa basura nga nitapon kasagbutan. Walay panimalay nga naapil sa maong sunog.—IBM BANAT NEWS