CEBU, Philippines — Mapasalamaton si Lapu-Lapu City Mayor Junard "Ahong" Chan sa Dakbayan sa Lapu-lapu, sa pagbisita sa Sagrada Familia sa iyang siyudad pinaagi sa Traslacion.
Matud pa ni Chan, nagmalampuson ang traslacion gikan sa ilang pagsugat diha sa tiilan sa 1st Mactan Bridge sa imahen sa Nuestra Señora de la Regla National Shrine.
Nagkanayon ang mayor, mapasalamaton siya sa grasya nga nadawat ug sa gugma sa balaan nga bata ngadto sa mga Oponganon.
Dugang pa ni Chan, bisan sa mga pagsulay nga nilabay sama sa bagyo, COVID-19 pandemic ug ingon man sa sunog nga miigo sa ilang lugar apan wala sila pasagdi sa balaan nga bata o sa Sagrada Familia.
Gipasalamatan usab sa mayor ang kadagkuan sa Basilica Minore Del Sto. Niño, Archdiocesan Shrine of Our Lady of Guadalupe ug National Shrine of St. Joseph sa Dakbayan sa Mandaue sa pagdala sa Sagrada Familia sa Lapu-lapu City.
Sa nasayran niadtong Sabado sa kadlawon gihimo ang send-off mass sa parokya sa Birhen sa Regla sa wala pa dalha ang Sagrada Familia sa Navforcen para sa fluvial parade balik sa dakbayan sa Sugbo.
Si Fr. Renante Joseph Ga, ang kura paruko sa parukya sa Birhen sa Regla kinsa maoy nipaambit sa homilies nibutyag nga maayo kaayo ang Ginoo sa tanang panahon tungod kay gikan sa pagsugat niini hangtud sa pagbiya kay gihatagan sila og maayong lakat sa panahon diin han-ay ug hapsay nga napahigayon.
Ang Traslacion usa ka pagbalhin gikan sa usa ka lugar ngadto sa laing lugar, diin gibuhat kini alang sa usa ka annual tradition nga nagtinguha sa pagpahinumdum sa mga magtutuo nga ang kalig-on ug bug-os sa pamilya naghatag kini og kahiusahan. (BANAT NEWS)