CEBU, Philippines — Patay ang usa ka menor de edad human kini nalumos sa dagat sa East Poblacion, Dakbayan sa Naga niadtong Miyerkules sa hapon.
Si Police Master Sergeant Jay Catani sa Naga City Police Station nga nahinabi sa DYSS Super Radyo GMA nagkanayon nga nakadawat sila og tawag labot sa niambak diha sa boardwalk.
Matud pa niya nga ang mga gwardya sa lugar naalarma ug mitabang sa batan-on. Apan sa paghaw-as sa batan-on nakabsan na kini sa kinabuhi.
Base sa nakuhang impormasyon sa kapolisan gikan sa banay sa bata nga kini hilumon ug dili tigtingog-tingog. Walay nasayod kun duna kini suliran.
Nasayran sab sa kapolisan nga wala mosulod sa iyang klase nianang adlawa ang bata. Kini grade 12 na tinun-an. Nasuta sab nga daw dunay mga bato sa backpack niini sa dihang kini miambak sa dagat.
Si Catani nitataw nga nisaka sa railings sa boardwalk ang batan-on, natuo ang mga tawo nga kinomedya lang kini apan niambak gyud kini. (BANAT NEWS)