CEBU, Philippines — Nagtinguha ang kapolisan ug mga opisyales sa barangay Poblacion, Syudad sa Talisay nga ibalik ang estrikto nga pagpatuman sa curfew alang sa mga menor de edad.
Si Police Lt. Col. Wayne Magbanua, hepe sa kapolisan nibutyag nga nibalik nasab og gara ang mga batan-on panahon sa kagabhion. Matud pa niya nga mas maayo nga ibalik ang estrikto nga pagpatuman sa curfew aron magpuyo na ang menor de edad sa lawom nga kagabhion.
Kini gitumong aron dili mabiktima ang mga menor sa krimenalidad ingon man malayo usab sa mga bisyo.
Mao usab kini ang tinguha ni kapitan Edward Alesna gumikan sa sunod-sunod nga pagpangawat sa ilang barangay.
Una niini, duha ka menor de edad nga taga Cogon, Pardo, Siyudad sa Sugbo ang nasuta nga responsable sa sunod-sunod nga pagpanglungkab sa mga establisamento sa Poblacion.
Nakuha sa CCTV footage ang gihimo sa mga batan-on hinungdan nga sila na rescue.
Mohangyo ang duha ka mga opisyal ngadto sa kagamhanan nga unta mabalik ang hiniusa nga pagpatuman sa curfew alang sa mga menor de edad. MEL BANAT NEWS