Coach Jay posibleng sa iyang sakyanan gipatay

CEBU, Philippines — Wala gisalikway sa kapolisan ang posibilidad nga ang pagpatay  kang Joel Jude Suson Unchuan o Coach Jay gihimo sa sulod sa sakyanan niini nga Toyota Fortuner nga na-recover niadtong Enero 1, 2024 didto sa Lungsod sa Liloan.

Matud pa ni Police Lieutenant Colonel Gerard Ace Pelare, tigpamaba sa Police Regional Office-7 sa ilang pag backtrack dunay mga higayon nga ang sakyanan nihunong og pila ka minuto.

Nasubay pinaagi sa Global Positioning System o GPS sa sakyanan ang mga lugar nga giadtuan niini gikan sa Nivel Hills sa Siyudad sa Sugbo niadto og Lapu-Lapu City dayon nibalik sa Barangay Mabolo, Cebu City dayon niadto na sab og Mandaue City ug niadto dayon sa Dakbayan sa Naga.

Gisubay kini karon sa kapulisan aron masuta kun asa posible nahimamat sa biktima ang mamumuno. Posible matod pa nga dili lang usa ang naghimo sa krimen.

“To be honest wala pa ta ka identify og tawo, as I’ve mentioned nag backtracking pa ta karon because we want to know kung asang dapita nisakay ang suspect kun ugaling nisakay man then kinsa sila but ang atong backtracking in previous cases has proven to be very effective nga makatabang gyud nato so mangayo lang mi gamay nga oras, it’s too early to tell you of things we are not sure of, our investigators are still on the ground,” ni Pelare pa. Wala pa madeterminar sa kapulisan kung pila ka tawo ang sakay sa sakyanan apan mao kini ang ilahang gisubay karon.

“Ang amoang assurance is we can really solve this case because of the available pieces of evidence that were gathered ilabi na ning cellphone, dashcam and the CCTV backtracking that we are doing,” ni Pelare pa.

Daghang anggulo ang gisubay ang kapulisan nga posibleng motibo sa krimen usa na niini ang robbery human matod pa nawala ang dili momenus P30,000 nga kwarta nga naa sa pouch sa biktima.

Wala pa mogawas ang resulta sa autopsy nga gihimo sa lawas ni Unchuan apan dihang napalgan kini nakit-an nga dunay agi nga kini gituok.

Giklaro sab sa opisyal nga cooperative ang pamilya sa biktima gani daghan sila og gitug-ang ‘personal dealings’ niini ug  mga kalihukan.

Mimando si PRO-7 Regional Director Brigadier General Anthony Aberin sa Cebu Police Provincial Office (CPPO) pinangulohan ni Colonel Percival Zorilla nga mohimo gyud og koprehensibong imbestigasyon sa maong krimen.

Sa pikas bahin, nipadangat sa ilang pahasubo ang konseho sa Dakbayan sa Sugbo ngadto sa pamilya ni Unchuan pinaagi sa resolution nga gipangamahanan ni Konsehal Rey Gealon.

Matud pa ni Gealon, si Unchuan dugay nang nahimo nga vocal coach sa Cebu, panelist, mentor ug judge sa Sinulog Idol sukad pagsugod niini 15 ka tuig na ang nakalabay. Dako siya og natampo sa mga Cebuano talents.

Gidayeg usab ni Gealon, ang kapulisan sa Dakbayan sa Naga, ug Cebu Provincial Police Office lakip ang Police Regional Office Central Visayas ubos sa pagdumala ni Police Director Brig. General Anthony Aberin sa paspas og tukma nga pag-imbestigar sa kamatayon ni Coach Jay. — IBM (BANATNEWS)