Sinulog 2024 venue sa SRP na gyud

CEBU, Philippines —  Sa South Road Properties (SRP) na gayud ang Sinulog Grand Parade 2024, kini ang gitug-an ni Cebu City Mayor Michael Rama kinsa kauban sa mga organizers ug mga opisyales sa siyudad nipahigayon ocular inspection diha sa venue kagahapon.

Matud pa sa Mayor, sulod sa duha ka semana gipaabot na mahuman na ang grand stand sa SRP uwan man o init. Sumala pa ni Rama, sementado na ang agianan alang sa mga float, gisugdan na usab pagbutang og flywood ang entablado nga sayawan sa mga contingents.

Dako na og kalainan ang sitwasyon niini sa milabay nga tuig kansang dapit lapukon kaayo nga maoy unang gisaway sa mga tawo ug pipila ka mga kritiko.

Gibutyag sab sa mayor nga sa Cebu City Sports Complex ipahigayon ang Sinulog sa Kabataan sa Lalawigan ug sa Dakbayan nga ipahigayon usa ka semana sa dili pa ang Sinulog grand parade.

Ang Sinulog sa Kabataan himoon sa Enero 13 ug 14 diin papilion samtang ang Kapitolyo maoy papilion kun unsa nga petsa  nila himuon ang Sinulog sa Lalawigan.

Sa inisyal nga impormasyong gipagawas sa Kapitolyo, dunay dili momenus 15 ka lungsod ug component cities ang mipadayag nga mosalmot sa Sinulog sa Kabataan sa Lalawigan.

Ang rota  unya sa Sinulog sa Kabataan magagikan sa Plaza Independencia padung  sa Cebu City Sport Complex.

Aron paghimo niini, gimando ni Rama sa kontraktor sa padayong gitrabahong Bus Rapid Transit nga ipatangtang lang una ang mga BRT Road Separators sa Osmeña Boulevard aron dili makaali sa mga contingents sa ilang street dancing ug malikay sa peligro sa mga tanan.

Ang maong dalan sab maoy agian unya sa  Penitential Walk sa imahen sa Balaan nga Bata.

Sa pikas bahin, preparado na anga Police Regional Office (PRO)-7 sa ilang security coverage sa umaabot nga kalihukan sa kapistahan sa Balaang Bata Sr. Sto. Niño ug sa Sinulog Grand Parade.

Dunay tulo ka Task Groups nga giumol si PRO-7 Regional Director Brigadier General Anthony Aberin  aron mosiguro sa seguridad sa tanan.

Kini ang Task Group Security, Task Group Peace and Order ug Task Group Emergency Response. Ang PRO-7 nakasugod na sa ilang meeting ug apil sa pagplano ang ubang ahensiya sa gobyerno sama sa Armed of the Philippines (AFP).

Dili pa kahatag ang PRO-7 kun pila ka polis ang posibleng i-deploy alang sa mga umaabot nga mga kalihukan.

“We already have a template makita ninyo during the last year Sinulog we were able to deliver a very safe and secured Sinulog kay contained man siya nga area again we will be establishing advance command post somewhere in Seaside para na ta oversee sa security preparations,” sigon ni Lt. Col.  Gerard Ace Pelare.

Mogamit gihapon ang kapulisan og teknolihiya sa pagbantay sa seguridad sama sa drones.  Sa pikas bahin, dili did-an ang publiko sa paggamit og drones, apan kinahanglan nga duna silay permiso.

“Like before the Regional Office will be the one to recommend to CAAP kinsa ra ‘tong pwede magpalupad og drones, in other words dapat i-accredited sa security forces kung kinsay pwede magpalupad og drones para dili maka violate sa rules and regulations,” pasabot ni Pelare.  --  IBM (BANATNEWS)