CEBU, Philippines — Duha ka sunog ang niulbo sa Dakbayan sa Sugbo ug Mandaue kagahapon hinuon walay gikataho nga naangol o namatay sa maong hitabo.
Unang sunog niulbo diha sa Sitio Lower Bonbonan A. Lopez Street, Barangay Labangon, Dakbayan sa Sugbo nga naglambigit og residential houses.
Ang maong sunog giingong nagsugd sa panimalay nga gipuy-an ni Zippora Mae Pacaldo.
Nadawat sa kabomberohan ang alarmas sa sunog alas 11:27 sa buntag diin giisa lang sa 1st alarm.
Ang kayo sa sunog nakontrolar sa kabomberohan alas 11:39 ug hingpit nga na fire out alas 11:42.
Gibana-banang nikabat ngadto sa P150 mil ang danyos sa maong sunog hinuon walay gikataho nga nakalas o naangol sa maong hitabo.
Nasayran nga tulo ka panimalay ang apektado diin duha ang partially burned ug usa ang hingpit nga naugdaw, lima ka pamilya ang nawagtangan og panimalay o 15 ka individual ang naapektohan sa nahisgutang sunog.
Samtang laing sunog ang niulbo diha sa Zone Camote, Barangay Paknaan, Dakbayan sa Mandaue nga naglambigit gihapon og residential houses.
Nikabat ngadto sa P500 mil ang danyos sa maong sunog nga giingong nagsugod sa panimalay ni Ariel Gipiga.
Nadawat sa kabomberohan sa siyudad ang alarma sa maong sunog mga alas 12:45 sa hapon.
Ang maong sunog giisa usab sa kabomberohan ngadto sa 1st alarm ug padayon pa nila nga gipaubos sa imbestigasyon ang hinungdan niini matud ni Superintendent Arnel Abella, fire marshal sa siyudad. BDB (BANATNEWS)