CEBU, Philippines — Tulo ka mga pagpamusil ang nahitabo sa Dakbayan sa Talisay sa nakalabay nga unom ka adlaw ning buwana.
Ang pinakauwahing hitabo nga pagpamusil nahitabo sa Sitio Bajadas, Barangay Tabunok niadtong Martes sa alas 7 sa gabii diin usa ka Hermogenes Reyes, 55, ang nabiktima.
Matud pa sa kapolisan, nagbuak og lubi si Reyes sa dihang kalit lang dunay nisulod sa ilang gate nga wala mailhing mamumuno nga nagtaptap sa tawong ug nagdala og balde sa tubig.
Naniid pa kini samtang nagtalikod ang biktima pero sa dihang nakahigayon na kini og pwesto nibunot sa armas ug gipusil kausa ang biktima dayon dalidaling nisibat.
Nakalingi pa ang biktima ngadto sa mamumuno ug gani nisuway pa man kini og target sa suspek gamit ang iyang gikuptang sundang apan naunhan kini.
Bisan nasamdan na, gikatahong misuway pa gyud og gukod sa suspek ang biktima apan nahagba kini pipila palang ka tikang dayon.
Matud pa, sa wa pa hingpit nakabsan sa kinabuhi ang biktima nakaestorya pa kini kun kinsa ang nagpusil kaniya. Matud pa ang mamumuno utangan kanila.
Ang gisubay nga motibo sa kapolisan sa maong kaso mao ang kalagot sa suspek kay gisigehan og paningil.
Niadtong Disyembre 25, sa alas 10 sa gabii, patay diha-diha dayon si Mark Mancia human gipusil sa wa pa mailhing mamumuno diha sa Sitio Mananga 2, Barangay Tabunok.
May kalambigitan sa ilegal nga drugas ang gisubay nga anggulo sa kapolisan ug giingong konektado ang pagpatay kaniya sa pagpatay sab nga nahitabo niadtong Disyembre 20, 2023 diha gihapon sa siyudad.
Ang biktima nga si Mancia, mao ang gitumbok nga impormante sa tawong nagpusil patay sa usa ka babayeng ginganlan og Jennie niadtong Disyembre 20 ning tuiga.
Kaning duha ka konektadong kaso giingong pulos may kalambigitan sab sa ilegal nga drugas.
Nahibaw-an sa otoridad nga nakadispalko sa kita sa ilegal nga drugas si Jennie gikan sa drug lord nga naa sa sud bilanggoan mao kini ang hinungdan nga gipahipos.
Ang Talisay City Police aduna nay mga persons of interest sa tanan nga pagpamusil sa Talisay apan nagdumili pa una sila pagbutyag samtang nagpadayon pa ang ilang imbestigasyon. (BANAT NEWS)