CEBU, Philippines — Gidakop ang usa ka 44-anyos nga habal-habal driver human matud pa nanghikap og pribadong parte sa lawas sa usa ka Grade 11 nga estudyante sa Awayan, Barangay Poblacion 3, dakbayan sa Carcar, niadtong Lunes sa gabii, Disyembre 25, 2023.
Ang suspetsado residente sa Sitio San Roque, Barangay Liburon samtang ang biktima nga 18-anyos nga dalagita nagpuyo sa Barangay Perrelos sa naasoy nga siyudad.
Matud ni Police Chief Master Sergeant Rowena Alesna Santillan, Pangulo sa Women’s and Children Protection Desk sa Carcar City Police Station nga ang biktima igo ra nagpalit og facemask sa tindahan sa maong lugar.
Dihang niduol na ang biktima sa tindhan ang suspect matod pa kalit lang nanghikap sa likod nga bahin sa paa sa biktima ug giingong bastos kaayo og tinan-awan.
"Nipalag ang biktima mao tong nagka-kumprontasi sila”, suma pa ni Santillan.
Nahitabo ang komprontasyon ug human niini ang biktima midangop sa Carcar City Police Station ug mi-report sa panghitabo.
Dali nga ni responde ang kapolisan sa lugar ug ang biktima positibo nga nitudlo sa suspek.
Kasamtangan nga gitanggong sa Carcar City Police Station ang suspetsado ug hayan mag-atubang kini og kasong kalapasan sa Republic Act No. 11313 kun "Anti-Bastos Law." MEL (BANATNEWS)