CEBU, Philippines — Walay kaatbang nga kapitan sa Barangay Candulawan, Dakbayan sa Talisay mao gihapoy gipili nga presidente sa Association of Barangay Council (ABC)sa maong siyudad human sa eleksyon sa mga opisyales sa Liga ng mga Barangay.
Ang eleksyon sa 22 ka mga kapitan gihimo sa Talisay City Hall niadtong miaging semana ug nigawas nga gisublian sa maong pwesto si kapitan Josefina Concial kinsa walay nakig-atbang para sa maong posisyon.
Si Concial dako og pasalamat nga walay nisuway og atbang kaniya sa iyang mga kaubanang kapitan. Si Concial nga naa na sa katapusan nga termino padayon nga moserbisyo uban sa Alayon nga gipangulohan ni mayor Gerald Anthony “Samsam” Gullas.
Sa iyang bahin, si Gullas nipaabot sa iyang pahalipay ni Concial ug nipasalig sa padayon nga suporta sa mga proyekto sa mga kapitan sa ilang barangay.
Nahibaw-an nga adunay tulo ngadto sa upat ka barangay sa Talisay nga mga kapitan nga dili iya sa Alayon.
Nakakuha si Concial og 22 botos busa siya nagtuo nga ang tanan gyud ang nihatag og suporta kaniya.— /IBM (BANAT NEWS)