Sakop sa MITCOM nga nakaluwas og kinabuhi atol sa sunog pasidunggan

CEBU, Philippines — Hatagan og pasidungog ang sakop sa Minglanilla Traffic Commission (MITCOM) kinsa maoy unang nakatabang sa mga tawo nga natanggong sa buhatan sa Municipal Trial Court (MTC) atol sa pag ulbo sa sunog niadtong Martes sa udto.

Si Minglanilla mayor Rajiv Enad sa iyang post sa social media nihulagway nga onse ka kinabuhi ang naluwas ni Jay Arvin Pasadas human siya nipatid sa pultahan sa building nga nasunog.

Giila ni Enad si Pasadas nga lokal hero o bayani sa iyang dali nga pagresponde sa mga tawo nga nagkinahanglan.

Gani siya nirekomendar nga hatagan og komendasyon si Pasadas sa konseho sa lungsod.

Naluwas man tuod ang 11 ka tawo lakip na ang huwes pero patay ang empleyado nga si Jose Agustus human napaig.

Sa imbistigasyon sa kapolisan nasuta nga si Agustus maoy gitudlo nila nga nagsugod sa sunog.

Giingon nga nagpasiga kini sa mga papel diha sa iyang lamesa.

Gipabadlong siya sa huwes pinaagi sa lain nila nga empleyado apan si Agustus mibunal og flourescent tube hangtud nga nahitabo ang komosyon ug napasagdan ang kayo hangtud nga kini misilaob. Duha ka building nga adunay daghang opisina sama sa Youth Development, Rural Health, MSWDO, post office, senior citizen ang naapektahan sa mao nga panghitabo. (BANAT NEWS)